भारत पाकिस्तानकेँ आतंकवादक मामिलामे बेनकाब करऽ लेल कतेको देशमे सांसद आदि सभक प्रतिनिधिमंडल पठाबऽ केर निर्णय कएलक अछि। एहेन प्रतिनिधिमंडलमे भारतीय जनता पार्टी (भाजपा) आ कांग्रेसक अलावा आन पार्टी सभक नेता सभ सेहो शामिल कएल गेल अछि। सरकार तृणमूल कांग्रेस (टीएमसी) केर सांसद आ पूर्व क्रिकेटर यूसुफ पठानकेँ सेहो शामिल कएलक अछि, मुदा कहल जा रहल अछि जे ओ एहि प्रतिनिधिमंडलमे शामिल नहि रहताह।
एहि बीच, केंद्रीय मंत्री आ लोजपा (रामविलास) केँ प्रमुख चिराग पासवान एहि मामिला पर प्रतिक्रिया देलनि जे एहि सभ विषय पर राजनीति नहि होयबाक चाही। जखनि अंतरराष्ट्रीय मंचक बात होइत अछि आ सर्वदलीय प्रतिनिधिमंडल जा रहल अछि, तँ एही विषय पर विवाद उचित नहि अछि। ओ फेर कहलनि जे जँ अपनामे किछु विरोधाभास अछि, तँ बैस कऽ ओहि पर चर्चा कएल जा सकैत अछि। मुदा, संसारक समक्ष एहेन बात सभकेँ उजागर करब हमरा नहि लगैत अछि जे ई देशहितमे अछि।
मुख्यमंत्री नीतीश कुमार संग सोमदिन भेल भेंटक बारेमे दरभंगामे केंद्रीय मंत्री चिराग पासवान कहलनि जे कतेको विषय पर हुनका संग चर्चा भेल। एहिसँ पहिने चिराग पासवान मुख्यमंत्री आवास पहुंचल छलाह आ मुख्यमंत्री नीतीश कुमार संग वार्ता कएने छलाह। एहि बर्ष होभयवाला बिहार विधानसभा चुनावक पहिने एहि भेंटकेँ महत्वपूर्ण मानल जा रहल अछि।
लोजपा (रामविलास) केर प्रमुख चिराग पासवान शनिदिन मुख्यमंत्री पदक बारेमे साफ कहने छलथि जे बिहारमे मुख्यमंत्रीक लेल कोनो वैकेंसी नहि अछि। बिहारमे वर्तमानमे मुख्यमंत्री नीतीश कुमार छथि। नीतीश कुमारक नेतृत्वमे एनडीए बिहारमे चुनाव लड़त आ चुनाव बाद जीत दर्ज कय नीतीश कुमारकेँ नेतृत्वमे एनडीए सरकार बनाओत।
