दिल्ली विधानसभा चुनावक लेल भाजपाक स्टार प्रचारक उत्तर प्रदेशक मुख्यमंत्री योगी आदित्यनाथ बृहस्पतिकेँ यमुना नदीक सफाई आ अन्य मुद्दा पर सत्तारूढ़ आम आदमी पार्टी (आप) आ ओकर प्रमुख अरविंद केजरीवाल पर तीक्षण हमला कयलनि। उत्तर प्रदेशक भाजपा सरकारक प्रदर्शनक तुलना करैत ओ कहलनि जे हुनक पूरा मंत्रिमंडल महाकुंभ नगरमे गंगामे डुबकी लगा चुकल अछि, की केजरीवाल एतय यमुनामे डुबकी लगेबाक हिम्मत कऽ सकैत छथि ?
ओ आरोप लगओलनि जे आम आदमी पार्टी ओखलाक विकासकेँ अनुमति नहि देलक, जखनि कि हम सभ उत्तर प्रदेशमे पूरा शहरकेँ ‘न्यू ओखला’क रूपमे विकसित कयलहुँ। आम आदमी पार्टीक नेताकेँ स्थिति देखबाक लेल नोएडा आ ग्रेटर नोएडा जयबाक चाही। उल्लेखनीय अछि जे नोएडाक पूरा नाम “न्यू ओखला इंडस्ट्रियल डेवलपमेंट अथॉरिटी” अछि।
उत्तर प्रदेशक मुख्यमंत्री कहलनि जे आम आदमी पार्टीक नेताक घरमे “आधार कार्ड मशीन”क माध्यमसँ बांग्लादेशी घुसपैठियासभकेँ अवैध आधार कार्ड देल गेल छल। ई लोक देश आ जनताकेँ धोखा दए रहल अछि। आब दिल्लीक लोक हुनकर जालमे नहि पड़त। ई लोकक कहब छनि जे ओ दिल्लीकेँ बिजली आ पानि देलनि। मुदा ओ ई उल्लेख नहि कयलनि जे जतय एनडीएमसीक अन्तर्गत बिजली भेटि रहल अछि, ई गृह मंत्रालयक अधीन अछि, शेष स्थानपर बिजलीक कटौती भऽ रहल अछि। उत्तर प्रदेश आउ आ देखू, हम सभ जिला मुख्यालयकेँ हिनकासँ बढ़िया आ सस्ता बिजली दऽ रहल छी।
योगी आदित्यनाथ कहलनि, “आइ भाजपाक डबल इंजन सरकार अहाँक आसपास काज करैत देखाइत अछि। एहिमे उत्तर प्रदेश, राजस्थान, हरियाणा आ मध्य प्रदेश सम्मिलित अछि। ई लोकसभ मुल्ला आ मौलवीसभकेँ अग्रिम वेतन दैत छलाह। दिल्लीक आर्थिक स्थिति एतेक खराब अछि जे हुनका कतेको माससँ वेतन नहि भेटल अछि। जखनि ओ लोकनि विरोध कयलनि तखन ई तकरा दबाबय लेल पुजारी आ ग्रंथिकेँ सेहो वेतन देबाक घोषणा कयलनि।”
ओ सवाल कयलनि, “की आप सरकार धार्मिक काज कयलक अछि ?” जँ अहां धार्मिक आयोजनक मॉडल देखय चाहैत छी तऽ वाराणसी, अयोध्या आ प्रयागराज आउ आ महाकुंभक विकासक मॉडल देखू । ओ कहलनि जे आम आदमी पार्टी “फूट डालू आ राज करू”क नीतिक अन्तर्गत भत्ता पर भत्ता दऽ रहल अछि।
