15 दिन पहिने आनल गेल दूटा नाबालिग किशोर असम आ बेगूसरायक निवासी अछि। पश्चिम बंगालक दार्जिलिंग विधान नगरमे दू टा किशोर अपन माता-पिता लग पहुंचि गेल।
कटिहार प्रखंड कार्यालय परिसरक समीप स्थित किशोर सुधार गृह प्रबंधन केर घोर लापरवाही एक बेर फेर सामने आबि गेल अछि। किशोर सुधार गृहक सुरक्षामे पैघ चूक भेल अछि। एहि ठामसॅं 12 फीट ऊँच देबाल कूदि कय छहटा नाबालिग किशोर भागि गेल। घटनाक बाद प्रशासनिक गलियारामे हड़कंप आ अफरा–तफरी मचि गेल।
प्राप्त सूचनाक अनुसार मंगलदिन राति 2 बजे 12 फीट ऊँच देबाल कूदि कय 6 किशोर भागि गेल। जखन मामिला सामने आयल तॅं जिला प्रशासन कार्यवाहीमे जुटि गेल आ तखने तीनटा किशोर पकड़ल गेल। दूटा केर वापस अनबाक प्रक्रिया चलि रहल अछि। एकटा एखनो गायब अछि।
हड़बड़ीमे भागल तीन नाबालिग किशोरकेँ दंडखोरा स्टेशन लगसॅं बचाओल गेल। नाम नहि छपवाक केर शर्त पर प्रबंधन समितिक एकटा सदस्य कहलनि जे, नाबालिग लड़का असम आ बेगूसराय केर निवासी अछि आ 15 दिन पहिने ओकरा आनल गेल छल। पश्चिम बंगालक दार्जिलिंग बिधान नगरमे दू टा किशोर अपन माता-पिता लग पहुंचि गेल अछि आओर एकटा किशोर एखनो फरार अछि, ओकरा बचाबय केर कोशिश जारी अछि।
बाल सुधार गृह केर लापरवाह प्रबंधनक कारण आलोचना भऽ रहल अछि। मात्र दूटा नाइट गार्ड केर मदतिसॅं एकरा संभारनाय मुश्किल साबित भऽ रहल अछि। संगहि सुरक्षा गार्ड बढ़ेबाक लेल जिला प्रशासन आ पुलिस प्रशासनमे कतेको बेर लिखित आ मौखिक आवेदन देल गेल अछि। एकर बादो एहि पर कोनो ध्यान नहि देल जा रहल अछि।
जनतब जे किशोर सभक एहि तरहे भागय केर घटना कोनो नव बात नहिं अछि। राज्यक विभिन्न सुधार गृह आ आश्रय गृहसॅं किशोर लड़का-लड़की केर फरार हेबाक खबरि सामने आबि रहल अछि। बहुतो बरामद भऽ जाइत छथि आ कतेको किशोर भागि जाइत छथि।
