प्रधानमंत्री नरेंद्र मोदी शनिकेँ बिहार दिवसक अवसर पर राज्यक लोकसभकेँ शुभकामना देलनि। ओ कहलनि जे केंद्र सरकार बिहारक सर्वांगीण विकास लेल हर संभव प्रयास करत। पीएम मोदी एक्स पर लिखलथि, “बिहार दिवस पर समस्त बिहारवासीकेँ हार्दिक बधाई! ई पावन भूमि, जे भारतीय इतिहास केर गौरवान्वित कयने अछि, आइ विकासक एकटा महत्वपूर्ण चरणसँ गुजरि रहल अछि। एहिमे बिहारक मेहनती आ प्रतिभाशाली लोकनिक महत्वपूर्ण भूमिका अछि। हमर सरकार बिहारक सर्वांगीण विकासक खातिर कोनो कसरि नहि छोड़त।”
ओतहि केंद्रीय गृहमंत्री अमित शाह सेहो बिहार दिवस पर राज्यक लोकसभकेँ शुभकामना देलनि। ओ बिहारक समृद्ध विरासत आ देशक विकासमे एकर योगदानक सराहना कयलथि। शाह एक्स पर पोस्ट कयलथि, “बिहार दिवसक हार्दिक शुभकामना! ज्ञान, परंपरा आ सांस्कृतिक विरासतक भूमि बिहार हरदम देशक नेतृत्व आ नवीन ऊर्जा प्रदान कयलक अछि। इतिहासक स्वर्णिम अध्यायसँ ल’ क’ आधुनिक भारतक निर्माण तक, बिहार हर क्षेत्रमे अपन अमिट छाप छोड़लक अछि। प्रधानमंत्री नरेंद्र मोदीक नेतृत्वमे एनडीए सरकार बिहारक प्रगति, समृद्धि आ आत्मनिर्भरताक नव ऊँचाई धरि पहुँचबामे प्रतिबद्ध अछि। हम बिहारवासीक खुशी, शांति आ समृद्धिक कामना करैत छी।
नीतीश कुमार एक्स पर पोस्ट करैत कहलनि, “बिहार दिवसक अवसर पर हार्दिक बधाई आ शुभकामन। बिहारक इतिहास गौरवमयी अछि आ हम वर्तमानमे अपन निश्चयसँ बिहारक गौरवमयी भविष्य तैयार क’ रहल छी। विकसित बिहारक सपना साधय लेल हम अहाँ सभक सहयोगक आह्वान करैत छी। हम सब मिलिकऽ बिहारक गौरव केर नव ऊँचाइयाँ पर पहुंचाएब।”
गौरतलब अछि जे 22 मार्च 1912 केँ बिहार, बंगालसँ अलग भ’ कऽ एकटा अलग प्रांत बनल छल, ताहि लेल एहि दिनकेँ राज्यक स्थापना दिवसक रूपमे मनाओल जाइत अछि।
