बिहार विधानसभा मे विपक्षक नेता तेजस्वी यादव कर्पूरी ठाकुरक पुण्यतिथि पर आयोजित कार्यक्रममे शामिल भेलाह। ई आयोजन सीतामढ़ीक सोनबरसामे भेल छल। एहि दौरान ओ कहलनि, कर्पूरी ठाकुरक शक्ति आ समाजवादकेँ देखू, जे हुनकर अपमान करैत छलाह ओ आब वैह लोक छथि जे भारत रत्न दैत छथि। तेजस्वी यादव अपन पिता आ बिहारक पूर्व मुख्यमंत्री लालू यादवकेँ सेहो भारत रत्नक दावेदारक रूपमे उल्लेख कयलनि।
तेजस्वी कहलनि जे आइ लालू यादवकेँ जे गारि दऽ रहल छथि हुनका सेहो एहि लोक सभकेँ भारत रत्न देबय पड़त।
बिहारमे जातिगत जनगणनाक चर्चा करैत तेजस्वी यादव कहलनि जे जखनि बिहारमे महागठबंधनक सरकार बनल छल तखनि आरक्षणक दायरा बढ़ेबाक लेल जातिगत जनगणना कयल गेल छल। मुदा, महागठबंधनक सरकार हटलाक बाद ई रुकि गेल।
बिहारक मुख्यमंत्री नीतीश कुमारकेँ ‘कठपुतली मुख्यमंत्री’ कहैत ओ कहलनि जे आब ओ थाकि गेल छथि। हुनका आब कोनो दृष्टि नहि अछि। ओ भाजपाक कठपुतली बनि गेल छथि। ओ कहलनि जे जतय नीतीश कुमार मोदी जीक थारी खींचैत छलाह, आइ ओ पैर पकड़ि कऽ भीख मांगैत छथि। जखनि समाजवादी शक्ति एकजुट होयत तखनि हम सामंती शक्तिकेँ सत्तासँ दूर रखबाक लेल काज करब। समाजमे झगड़ा भड़काबयवला लोककेँ हम सत्तामे नहि आबय देब।
ओ कहलनि जे लालू प्रसाद यादव सेहो सामाजिक परिवर्तन अनने छथि आ जे आइ लालू यादवकेँ अपमान करैत छथि हुनका इ याद रखबाक चाही जे ओ लोक एक दिन हुनका भारत रत्नसँ सम्मानित करबाक काज करत। ओ लोकसभसँ अवसर माँगलनि आ कहलनि जे हम आर्थिक न्यायक माध्यमसँ अहाँकेँ बेरोजगारी, असहायता आ प्रवाससँ मुक्त करबाक लेल काज करब।
