बृहस्पति दिन मुजफ्फरपुरक नंद विहार कॉलोनीमे प्रवेश कर्णक आवास पर भारत सरकारसँ पंजीकृत संस्था ‘कर्ण कायस्थ महासभा’क बिहार इकाई द्वारा ‘स्वजन स्नेह मिलन समारोह’ आयोजित भेल।
एहि अवसर पर मुख्य अतिथिक रूपमे पटनासँ आएल कर्ण कायस्थ महासभाक प्रदेश अध्यक्ष डॉ. विनय कर्ण कहलनि जे सांस्कृतिक रूपसँ समृद्ध अपन परम्पराकेँ आत्मसात करय वला कर्ण कायस्थ समाजकें सबठाम एकजुट हेबाक आवश्यकता अछि। कर्ण कायस्थ महासभा केर उद्देश्य, गतिविधि एवं उपलब्धि सभ पर प्रकाश दैत ओ कहलनि जे बेसीसँ बेसी सदस्य बनाकए महासभाकें सुदृढ़ करबाक पहल हेबाक चाही। विगत छः वर्षमे क्रमशः दरभंगा, काठमांडू एवं दिल्लीमे आयोजित तीनटा ‘कर्णकुम्भ’क माध्यमसँ केकेएम कर्ण कायस्थकें एक मंच पर आनय केर प्रयास कयलक अछि, जाहिमे दुनिया केर छत्तीस देशमे रहनिहार कर्ण कायस्थ सभकेँ नहि केवल एकजुट करबाक प्रयास कएल गेल अछि, बल्कि विभिन्न देशक प्रतिनिधित्व एवं सहभागिता तीनू कर्णकुम्भमे स्पष्ट परिलक्षित भेल। कर्ण कायस्थ समाजक आर्थिक रूपसँ असक्षम लोकक बीमारीक उचित चिकित्सा, दहेज मुक्त विवाह, छात्र/छात्राक पढ़ाई एवं नामांकन आदिमे आर्थिक मदति, सफल भेला पर युवा सभक सम्मान, कला, शिक्षा, खेल, साहित्य केर क्षेत्रमे उभरैत प्रतिभाक लेल मंच एवं प्रोत्साहन, वृद्ध, दिव्यांग, निराश्रित महिला सभक लेल आर्थिक सहायता वा अर्थोपार्जनक व्यवस्था, बुजुर्ग सभक सम्मान, मैथिली भाषाक उन्नयन आदिक लेल ई महासभा लगातार कार्य कऽ रहल अछि। महासभा द्वारा ‘कर्णप्रिय’ नामक पत्रिकाक प्रकाशन कएल जा रहल अछि, जेकरा माध्यमसँ विरासतकें लिपिबद्ध कएल जा रहल अछि।
डॉ. कर्ण एहि पत्रिका केर नियमित मुद्रण आ प्रकाशनक संग-संग एकर प्रचार प्रसार मिथिलाक घर-घरमे हेबाक अभिलाषा व्यक्त कएलनि।
अपन अध्यक्षीय उद्गारमे शहरक ख्यातिलब्ध चिकित्सक डॉ सी के दास कहलनि “ई गर्वक विषय थिक जे कर्ण कायस्थ महासभा भारत सरकार द्वारा पंजीकृत संस्था अछि। एकरा माध्यमसँ समाजकेँ सुदृढ़ करय एवं नव दृष्टिकोणसँ आगाँ बढ़य केर प्रेरणा भेटतै। हमरा सभकें अपन अग्रज पीढ़ीसँ प्रेरणा ल’कए युवा सभकें प्रोत्साहित करबाक चाही ताकि अपन समाजकेँ नव दिशा देल जा सकय।
समारोहमे उपस्थित सुभाष दास, विजय कुमार चौधरी, डॉ पंकज कर्ण, सत्यम कंठ, कल्पना कुमारी कर्ण, संजीत कुमार कर्ण आदि कर्ण कायस्थ समाजकें केकेएम केर संग एकजुट भ’ क’ समाजक प्रगति-उन्नति एवं सकारात्मक सामाजिक बदलावमे अपन योगदान दे’बा सन अपन अपन भावक अभिव्यक्ति प्रदान कयलनि।
एहिसौं पूर्व मुख्य अतिथि सभक स्वागत शॉल, पाग एवं पुष्पगुच्छसौं कएल गेल। स्वागत उद्गार प्रवेश कुमार, धन्यवाद ज्ञापन नीतू कुमारी, संचालन एवं संयोजन महासभाक प्रदेश उपाध्यक्ष पल्लवी सिन्हा कयलनि।
एहि अवसर पर चंदन कुमार, सुधीर कुमार, सुमित सौरभ, रश्मि कुमारी, विजय कुमार दास, मनोरंजन दास, सत्यजीत सिन्हा आदि अनेक गोटे उपस्थित रहलथि।
कोनो समाजक उन्नति ओकर व्यापक आधार, समर्पित सदस्यगणक निःस्वार्थ सेवा आओर पारस्परिक सहयोग पर निर्भर करैत अछि। ‘केकेएम’ (कर्ण कायस्थ महासभा) कर्ण कायस्थक पहिल राष्ट्रीय पंजीकृत संस्था अछि। ई संस्था स्वार्थ नहि परमार्थ यानि समाजक उपकारक उद्देश्यसौं बनल अछि। ‘कर्ण कायस्थ महासभा’क बिहार प्रदेश इकाई द्वारा मुजफ्फरपुरमे आयोजित ‘केकेएम स्वजन स्नेह – मिलन समारोह’मे प्रख्यात शिक्षाविद, समाज सेवी और केकेएम बिहार प्रदेश अध्यक्ष डॉ. विनय कर्ण अपन सम्बोधनमे ई उद्गार व्यक्त कयलनि। ओ कहलनि जे कर्ण कायस्थ एकटा कलमजीवी, प्रबुद्ध एवं प्रगतिशील समाज अछि। एकर जिम्मेवार सदस्यक नाते हमरा सभकें मानव कल्याणक दृष्टिसँ समाजक प्रति अपन दायित्वक निर्वहन करबाक चाही। निजी समस्या एवं पूर्वाग्रह आदिसँ ऊपर उठिकए सामाजिक सद्भाव आ सामुदायिक कल्याणक निमित्त यथासंभव योगदान केनाय हमार ध्येय हेबाक चाही।
‘कर्ण कायस्थ महासभा’ कर्ण कायस्थक पहिल एहेन रजिस्टर्ड संस्था अछि, जेकर वैश्विक उपस्थिति सर्व विदित अछि। अपन कल्याणकारी एवं समाज हितैषी योजना सभक नियमित क्रियान्वयनक कारण ‘केकेएम’ गाँव-देहात मे रहि रहल कर्ण कायस्थ परिवारक संग – संग भारतक महानगर एवं देश -विदेशमे सेहो प्रतिष्ठा प्राप्त कए रहल अछि।
