महिला गार्ड कुलविंदर कौर गिरफ्तार आ तत्काल प्रभावसँ निलंबित।
*
चंडीगढ़ समदिया
*
कंगना रनौतसँ जुड़ल एकटा सनसनीखेज समाचार सामने आयल अछि। ओ आरोप लगओलनि जे चंडीगढ़ हवाई अड्डा पर सीआईएसएफक एकटा महिला गार्ड कुलविंदर कौर हुनका थप्पड़ मारलक। कंगना गार्डक खिलाफ सख्त कारवाईक मांग कयलनि। मुदा, ई खुलासा नहिं भेल अछि जे कंगनाकेँ किएक थापड़ मारल गेल अछि, आ नै कंगना एकर कारण बतौलनि।
पुलिस सूत्रसँ प्राप्त जानकारीक अनुसार, अभिनेत्री आ भाजपा सांसदक ६ जूनकेँ दुपहरिया लगभग ३:०० बजे एकटा महिलासँ झगड़ा भेल। कंगनाकेँ विस्तारा एयरलाइन्स द्वारा चण्डीगढ़सँ दिल्ली जयबाक छल। सुरक्षा जाँचक क्रममे महिलाक संग कंगनाक झगड़ा भऽ जाइत अछि। चंडीगढ़ हवाई अड्डा पुलिस एखन धरि किछु बताबयसँ मना कऽ रहल अछि, यद्यपि अभिनेत्री ३:३० बजे धरि चलि गेलीह। जनतब अछि जे महिला गार्ड कुलविंदर कौरकेँ तत्काल गिरफ्तार कयल गेल आ तत्काल प्रभावसँ निलंबित कय देल गेल अछि।
कंगना लोकसभा चुनाव २०२४मे हिमाचल प्रदेशक मंडी संसदीय क्षेत्रसँ जीति चुकल छथि।
