रेल मंत्री अश्विनी वैष्णव पश्चिम बंगालक न्यू जलपाईगुड़ीमे भेल रेल दुर्घटनामे मृतकक परिवारकेँ १०-१० लाख टाकाक आर्थिक सहायता देबाक घोषणा कयलनि अछि। रेल मंत्री सोशल मीडिया प्लेटफॉर्म एक्सक माध्यमसँ एकर घोषणा कयलनि अछि। लिखलनि, “पीड़ित सभकेँ बढ़ल अनुग्रह राशि देल जायत, मृत्यु भेला पर १० लाख रुपया, गंभीर रूपसँ घायलक लेल २.५ लाख रुपया आ मामूली चोट लेल ५०,००० टाकाक आर्थिक सहायता देल जायत।”
एहिसँ पहिने रेल मंत्री अश्विनी वैष्णव एहि दुर्घटनापर दुख व्यक्त करैत एक्स पर लिखलनि जे रेलवेक एनएफआर जोनमे एकटा दुर्भाग्यपूर्ण दुर्घटना भेल अछि। बचाव कार्य युद्ध स्तर पर चलि रहल अछि। रेलवे, एनडीआरएफ आ एसडीआरएफ पूर्ण समन्वयसँ काज कऽ रहल अछि। घायलकेँ अस्पताल पहुँचाओल जा रहल अछि।”
ओतहि कंचनजंगा एक्सप्रेस दुर्घटना पर प्रधानमंत्री कार्यालय मृतकक परिवारकेँ २ लाख आ घायलकेँ ५० हजार टाकाक मुआवजा देबाक घोषणा कयलक अछि। प्रधानमंत्री कार्यालय एक्स पर लिखलक, “प्रधानमंत्री नरेन्द्र मोदी घोषणा कयलनि अछि जे पश्चिम बंगालमे रेल दुर्घटनामे मारल गेल प्रत्येक व्यक्तिक परिजन सभकेँ प्रधानमंत्री राष्ट्रीय राहत कोषसँ २ लाख टाका देल जायत। घायलकेँ ५०,००० टाका देल जाएत।”
एहिसँ पहिने राष्ट्रपति द्रौपदी मुर्मू, प्रधानमंत्री नरेन्द्र मोदी, गृह मंत्री अमित शाह आ कतेको अन्य नेता एहि दुर्घटनापर दुख व्यक्त कयलनि। रेल दुर्घटना पर दुख व्यक्त करैत राष्ट्रपति द्रौपदी मुर्मू लिखलनि, “पश्चिम बंगालक दार्जिलिंगमे भेल रेल दुर्घटनामे लोकक मृत्युक समाचार बहुत दुखद अछि। हमर संवेदना आ प्रार्थना शोक संतप्त परिवारक संग अछि। हम घायलक शीघ्र स्वस्थ होयबाक प्रार्थना करैत छी।”
पीएम मोदी एक्स पर लिखलनि, “पश्चिम बंगालमे भेल रेल दुर्घटना दुखद अछि। जे अपन प्रियजनकेँ खो देलनि हुनका प्रति हमर संवेदना अछि। हम प्रार्थना करैत छी जे घायल सम जल्दी ठीक भए जाए। अधिकारी सभसँ बात कयलहुँ आ स्थितिक जायजा लेलहुँ। प्रभावितक सहायताक लेल बचाव अभियान चलि रहल अछि। रेल मंत्री अश्विनी वैष्णव सेहो दुर्घटना स्थल पर जा रहल छथि।”
गृहमंत्री अमित शाह ट्वीट कयलनि, “पश्चिम बंगालक न्यू जलपाईगुड़ीमे भेल रेल दुर्घटना बहुत दुखद अछि। हम एहि दुर्भाग्यपूर्ण दुर्घटनामे अपन परिवार गमाबयवला लोकक प्रति अपन संवेदना व्यक्त करैत छी आ घायललोकनिक शीघ्र स्वस्थ होयबाक कामना करैत छी।”
पश्चिम बंगालक दार्जिलिंगमे सोमदिन एकटा पैघ रेल दुर्घटना भेल। न्यू जलपाईगुड़ीमे रंगपानी स्टेशनक समीप पाछूसँ आबि रहल एकटा मालगाड़ी कंचनजंगा एक्सप्रेसकेँ टक्कर मारि देलक। एहि दुर्घटनामे ८ लोकक मृत्यु भेल अछि। जखन कि कतेको यात्रीक घायल हेबाक सूचना सेहो अछि।