दिल्लीक एकटा न्यायालय मंगलदिन राजद प्रमुख लालू प्रसाद यादव, हुनकर बेटा तेज प्रताप यादव आ बेटी हेमा यादवकेँ नौकरीक बदला जमीन घोटालासँ जुड़ल सीबीआई मामिलामे सम्मन कयलक। राउज एवेन्यू कोर्ट लालूक छोट बेटा आ बिहारक पूर्व उपमुख्यमंत्री तेजस्वी यादवकेँ सेहो नव सम्मन जारी कयलक आ ११ मार्चकेँ उपस्थित होयबाक लेल कहलक।
विशेष न्यायाधीश विशाल गोग लालूक बेटा आ बिहारक पूर्व मंत्री तेज प्रताप यादव आ बेटी हेमा यादवकेँ सेहो सम्मन पठौलनि। जारी आदेशमे आरोपी सभकेँ ११ मार्चकेँ अदालतमे उपस्थित होयबाक निर्देश देल गेल अछि।
अधिकारी सभक अनुसार ई मामिला मध्य प्रदेशक जबलपुर स्थित भारतीय रेलवेक पश्चिम मध्य क्षेत्रमे २००४ सँ २००९ केर बीच केन्द्रीय रेल मंत्रीक रूपमे प्रसादक कार्यकालमे राजद सुप्रीमोक परिवार वा सहयोगीक नाम पर भर्ती द्वारा उपहारमे देल गेल वा हस्तांतरित भूमि बदलामे कयल गेल समूह डी नियुक्तिसँ सम्बन्धित अछि।
अदालत भ्रष्टाचारक मामिलामे सीबीआईक अन्तिम आरोपपत्रक संज्ञान लेलाक बाद सम्मन जारी कयलक। एजेंसी एहि मामिलामे ३० सरकारी अधिकारी सहित ७८ लोकक नाम लेने अछि। ईडी द्वारा जाँच कयल जा रहल धनशोधन मामिलामे लालू यादव आ हुनकर दूनू बेटाकेँ पहिनेसँ जमानत भेटि चुकल अछि।
जनतब जे कथित घोटाला २००४ सँ २००९ केर बीच केन्द्रीय रेल मंत्रीक रूपमे लालू प्रसादक कार्यकालक अछि। सीबीआई मई २०२२मे लालू, हुनकर बेटा-बेटी आ पत्नी सह पूर्व मुख्यमंत्री राबड़ी देवीक विरुद्ध मामिला दर्ज कयलक।
