झारखण्डमे झारखंड मुक्ति मोर्चा, कांग्रेस, राष्ट्रीय जनता दल आ वाम दल ‘इंडिया’ ब्लॉकक अन्तर्गत विधानसभा चुनाव एक सङ्ग लड़बाक लेल सहमत भऽ गेल अछि। गठबंधनक नेता आ झारखण्डक मुख्यमंत्री हेमंत सोरेन शुक्रदिन एकटा संवाददाता सम्मेलनमे एकर घोषणा कयलनि।
सोरेन कहलनि जे गठबंधनक अन्तर्गत झारखंड मुक्ति मोर्चा आ कांग्रेसक उम्मीदवार ७० सीटपर चुनाव लड़त, जखन कि शेष ११ सीटपर राष्ट्रीय जनता दल आ वाम दलक उम्मीदवार चुनाव लड़ताह। चारु घटक दल चुनावी क्षेत्रमे एक संग उतरत। ८१ सदस्यीय विधानसभाक चुनाव नवम्बरमे होबयवला अछि।
मुख्यमंत्री कहलनि जे राष्ट्रीय जनता दल आ वाम दलक नेताक संग वार्ताक बाद जल्दिये घोषणा कयल जायत जे कोन पार्टी लग कोन सीट पर उम्मीदवार होयत। २०१९ केर विधानसभा चुनावमे वाम दलक सङ्ग कोनो गठबन्धन नहि छल, मुदा एहि बेर एक सङ्ग मजबूतीसँ लड़बाक तैयारी कयल गेल अछि।
पत्रकार सम्मेलनमे झारखंड कांग्रेसक प्रभारी गुलाम अहमद मीर, मंत्री डाॅ रामेश्वर उरांव आ झामुमोक महासचिव आ प्रवक्ता विनोद पाण्डेय आ झामुमोक विधायक सुदिव्य कुमार सोनू सेहो उपस्थित छलाह।
मानल जा रहल अछि जे मुख्यमंत्री हेमंत सोरेन शनिदिन रांची आबि रहल कांग्रेस नेता राहुल गांधी आ राजद नेता तेजस्वी यादव संग गठबंधन सीट बंटवारा पर चर्चा करतथि। एकर बाद एक-दू दिनमे प्रत्येक सीटक बारेमे आधिकारिक घोषणा कयल जायत। २०१९ केर चुनावमे झामुमो ४३ सीट, कांग्रेस ३१ आ राजद सात सीट पर उम्मीदवार उतारने छल।
एनडीए शुक्रदिन राज्यमे सीटक बँटवाराक घोषणा कयने छल। भाजपा ६८ सीटपर अपन उम्मीदवार ठाढ़ करत, जखनि कि आजसू पार्टीकेँ १०, जनता दल यूनाइटेडकेँ दू आ लोक जनशक्ति पार्टी (रामविलास) केँ एकटा सीट देल गेल अछि।
८१ सदस्यीय झारखंड विधानसभाक चुनाव दू चरणमे १३ आ २० नवम्बरकेँ होयत, जखन कि मतगणना २३ नवम्बरकेँ होयत।
