भागलपुरमे जदयू महानगर अध्यक्ष राजदीप उर्फ राजा यादवकेँ शनिदिन सड़कक बीचमे उपद्रवी सभ भयंकर पीटाई कयलक। ई घटना विश्वविद्यालय क्षेत्रक पार्वती चौक लग भेल छल। जतय उपद्रवी सभ राजा यादवकेँ भीड़-भाड़ वला बजारमे घसीटलक आ लाठीसँ मारलक। उपद्रवी सभ हुनका मारिकय हुनक कपड़ा सेहो फाड़ि देलक। जेडीयू नेता शरारती तत्वसँ अपन जानक भीख मांगैत रहलाह, मुदा गुंडसभ हुनका लाठी आ लातसँ पीटैत रहल, जखन मन मारि-पीटसँ भरि गेल तखन गुंडसभ अपन पैर पकड़ा माफी मँगेलक आ पिटाई केर वीडियो बना वायरल कऽ देलक।
एहि मामिलाक बारेमे कहल जा रहल अछि जे दुनू पक्षक बीच ४० कट्ठा जमीन पर कतेको सालसँ विवाद छल। जाहिमे जेडीयू केर नेता हस्तक्षेप करय आयल छलाह, एहि दौरान हुनका सभकेँ पिटाई कय देल गेल।
मारनिहार लोकक कहब अछि जे ई भूखंड हुनकर अछि आ राजा यादव एहि जमीन पर कब्जा करबाक प्रयास कऽ रहल छलाह। ई घटना सड़क पर लागल सीसीटीवीमे दर्ज कयल गेल छल। एम्हर जहिना घटनाक सूचना भेटल, दूटा थानाक पुलिस घटनास्थल पर पहुँचि गेल। जेडीयू नेता पुलिसमे लिखित शिकायत कयलनि आ उपद्रवीक खिलाफ कारवाईक मांग कयलनि।
राजा यादवक एकटा निकट सहयोगीक कहब छनि जे भूखंड पर काज चलि रहल छल। राजा यादव लगक दोकानमे बैसल छलाह। तखन कन्हैया यादव, धनंजय यादव आ पल्टू यादव सहित १० गोटे मजदूरकेँ पीटय लगलाह, मशीन फेकय लगलाह आ काज रोकि देलनि। एहि बातक सूचना भेटलाक बाद राजा यादव जखन घटनास्थल पर पहुँचलाह तखन आरोपी हुनका बीचे सड़क पर पीटय लागल। ओ गम्भीर रूपसँ घायल भऽ गेलाह आ हुनका इलाजक लेल स्थानीय रेफरल अस्पताल लऽ जायल गेल।
