राष्ट्रगानक अपमान पर राजनीतिक घमासान जारी अछि। राष्ट्रगान विवाद पर राजद सीएम नीतीश कुमार पर जोरदार हमला कएलक। आब सीएम नीतीश कुमारक पार्टी लालू परिवार पर पलटवार कएलक अछि।
जदयू’क एमएलसी आ मुख्य प्रवक्ता नीरज कुमार विधान परिषद् परिसरमे एकटा चित्र देखेलनि। एहिमे राजद सुप्रीमो लालू यादव राष्ट्रगानक समय बैसल छलथि। नीरज कुमार कहलनि जे राष्ट्रवादक प्रमाण पत्र देनिहार आरजेडी केर अपन नेता सभक इतिहास याद करबाक चाही। ई चित्र 2002 केर अछि, जहिया मार्च फास्ट भ’ रहल छल आ ओहि समय आरजेडीक नेता आ मुख्यमंत्री राबड़ी देवी राष्ट्रीय गानक दौरान कुर्सी पर बैसल रहलीह।
जदयू एमएलसी कहलनि जे ओहि समय राष्ट्र गान गाओल जा रहल छल, लोक सभ ठाढ़ छल, मुदा राबड़ी देवी कुर्सी पर बैसल रहलीह। नीरज कुमार आरोप लगएलन्हि जे ओहि समयक राज्यपाल पुरस्कार वितरण क’ रहल छलाह आ परंपराक अनुसार, जखनि राज्यपाल जाइत छथि, तकर बाद मुख्यमंत्री स्थान छोड़ैत छथि, मुदा राबड़ी देवी राज्यपालकेँ जेबासँ पहिने स्थलसँ चलि गेलीह।
नीरज कुमार कहलनि जे आइ ई सभ सीएम नीतीश कुमारसँ इस्तीफा माँगि रहल छथि, पहिने राबड़ी देवीकेँ विपक्षक नेता पदसँ इस्तीफा देबाक चाही। ई लोक फर्जी राष्ट्रवादी छथि, नकली राष्ट्रवादी छथि आ भ्रष्टाचारी छथि।
नीरज कुमार एतबहि पर नहि रुकलाह, ओ कहलनि जे 15 अगस्त 1997 केँ तत्कालीन मुख्यमंत्री लालू प्रसाद यादव राष्ट्रगानक अपमान कयने छलाह। जखनि देश 50म स्वतंत्रता दिवस मना रहल छल, तखनि लालू प्रसाद यादव राष्ट्रध्वज उल्टा फहरा देने छलाह। एही मामिला पर लालू प्रसाद यादवक खिलाफ इंदौरमे केस दर्ज कएल गेल छल, मुदा बिहारमे एहि मुद्दा पर कोनो कार्यवाही नहि भेल। तहिना तेजस्वी यादवक बयान पर नीरज कुमार कहलनि जे तेजस्वी यादव स्वयं सजायाफ्ताक पुत्र छथि, मुदा ओ एहेन व्यक्तिकेँ राष्ट्रवादक ज्ञान दय रहल छथि जिनकर पिता स्वतंत्रता सेनानी रहलाह। नीतीश कुमार ओ व्यक्ति छथि जे दलितक हाथमे राष्ट्रीय झंडा देलनि।
