नेपालक तीर्थयात्रीक रामलला दर्शनक सपना जल्दिये पूरा होबय जा रहल अछि। रविदिन नेपाल रेलवेक जीएम सेहो एकर निरीक्षण कयलनि। नेपाल रेलवेक महाप्रबन्धक निरंजन झासँ विशेष बातचीतमे निरंजन झा कहलनि जे जनकपुर (नेपाल) सँ अयोध्या (भारत) धरि रेल संचालनक लेल नेपाल रेलवे द्वारा सब तैयारी पूरा कऽ लेल गेल अछि। एकर आधिकारिक घोषणा भारतीय रेलवे द्वारा कयल जायत। ओ कहलनि जे जनकपुरसँ अयोध्या लेल रेलगाड़ी चलाबयसँ पहिने नेपाल रेलवे द्वारा सब तैयारी शुरू कऽ देल गेल अछि। रेलवे पटरीक स्थिति देखबाक लेल ओ स्वयं जनकपुरसँ जयनगर रेल खण्डक ट्रॉलीक माध्यमसँ निरीक्षण कयलनि। महाप्रबंधक कहलनि जे ट्रेन संचालनक तिथि एखन धरि तय नहिं कयल गेल अछि, मुदा पूर्व मध्य रेलवेक पीसीओक सङ्ग बातचीत भेल अछि। ट्रेन संचालनक समय सारणी तैयार कऽ नेपालमे भारतीय राजदूतक माध्यमसँ पूर्व मध्य रेलवेकेँ पठाओल गेल अछि। जनकपुर आ अयोध्याक बीच रेल सेवासँ दुनू देशक बीच निकटता बढ़त। रोटी-बेटीक संबंध मजबूत होयत।
महाप्रबन्धक कहलनि जे नेपालक रेल परियोजनामे भारतक पैघ योगदान रहल अछि। भारत सरकार इरकॉन इन्टरनेशनल कम्पनीक सहयोगसँ नेपालमे ट्रेन संचालनक आधारशिला रखलक आ आइ कोंकण रेलवे आ नेपाल रेलवेक सहयोगसँ विगत दू वर्षसँ नेपाली ट्रेनक सफलतापूर्वक संचालन भऽ रहल अछि। ओ बतौलनि जे जनकपुर (नेपाल) सँ अयोध्या (भारत) धरि साप्ताहिक ट्रेन चलत। २० डिब्बा वला एहि ट्रेनमे एसी क्लासक अतिरिक्त स्लीपर आ जनरल कोच सेहो लगाओल जायत। जनकपुरसँ ई ट्रेन शनि दिन १३:३० बजे अयोध्या लेल प्रस्थान करैत अगिला दिन भोर ४ बजे अयोध्या पहुँचत। ई ट्रेन अयोध्यासँ राति १७ बजे प्रस्थान करैत मंगल दिन भोर ८ बजे जनकपुर पहुँचत। ओ कहलनि जे जनकपुर-नेपाल अयोध्या नव रेलगाड़ीकेँ नई दिल्ली तक विस्तारित करबाक प्रस्ताव पठाओल गेल अछि। रेल परिचालनक घोषणासँ पूर्व रेल पटरीक स्थिति जानबा लेल जनकपुर-जयनगर रेल खण्डक विभिन्न स्टेशनक निरीक्षण कयल गेल अछि।
