केंद्रीय रेल मंत्री अश्विनी वैष्णव काल्हि शुक्रदिन एक दिवसीय दौरा पर मुंगेर पहुँचलाह। एहि दौरान एशिया’क प्रसिद्ध रेल इंजन कारखानाक लेल आईआरआईएमईई केर सभागारमे घोषणा कयलनि कि 350 करोड रुपयाक लागतसँ जमालपुर कारखानाक कायाकल्प कयल जाएत। एहि मौका पर केंद्रीय मंत्री राजीव रंजन सिंह उर्फ ललन सिंह, बिहार सरकारक डिप्टी सीएम सम्राट चौधरी आ विजय सिन्हा सेहो मौजूद छलथि।
कार्यक्रमकेँ संबोधित करैत केंद्रीय रेल मंत्री अश्विनी वैष्णव कहलनि कि ई कारखाना भारतक सबसँ पुरान कारखाना अछि। एकर विकास लेल जे काज करबाक होयत, तकरा शीघ्र धरातल पर उतारल जाएत।
ओ कहलनि कि जमालपुर रेल कारखानक विकास खातिर रूपरेखा तैयार कयल गेल अछि। 350 करोड़ रुपयाक लागतसँ जमालपुर कारखानाक विकास होयत। वैष्णव बिहारक जमालपुरमे रेलवेक आत्मनिर्भरता पर जोर देलनि।
रेल मंत्री अश्विनी वैष्णव कहलनि जे उन्नत प्रौद्योगिकीक विकास संग रेलवे वंदे भारत आ नमो भारत जकां नव ट्रेनक निर्माणमे आत्मनिर्भर बनि रहल अछि। वैष्णव कहलनि जे प्रधानमंत्री नरेंद्र मोदीक नेतृत्वमे अंतिम 10 वर्षमे देश 50,000 किलोमीटर रेलवे नेटवर्कक विद्युतीकरण कयलक अछि।
ओ कहलनि जे भारत हर क्षेत्रमे आत्मनिर्भरताक शक्ति देखेलक अछि, एहिमे हालमे कएल गेल ‘ऑपरेशन सिंदूर’ सेहो शामिल अछि। ‘ऑपरेशन सिंदूर’मे देशक सशस्त्र बल पाकिस्तानक हवाई अड्डाकेँ नेस्तनाबूद कय देलक।
रेलमंत्री अश्विनी वैष्णव वा जमालपुरमे स्थित इंडियन रेलवे इंस्टीट्यूट ऑफ मेकैनिकल एंड इलेक्ट्रिकल इंजीनियरिंग आईआरआईएमईईकेँ हर सम्भव सहयोगक आश्वासन देलनि। हुनका द्वारा जमालपुर लोकोमोटिव वर्कशॉप आ आईआरआईएमईई केर विकास लेल 350 करोड़ रुपया केर कार्य योजना शुरू कएल गेल।
रेलमंत्री कहलनि जे 2026 केर शैक्षणिक सत्र धरि आईआरआईएमईई (भारतीय रेलवे यांत्रिक एवं विद्युत इंजीनियरिंग संस्थान) संस्थानमे सामान्य छात्रसभक सेहो दाखिला होयत। आगू कहलनि गति शक्ति विश्वविद्यालयक कुलपति शीघ्र एहि संदर्भमे जमालपुरक दौरा करताह।
बैसारमे मुंगेर विधायक प्रणव कुमार यादव, जमालपुर विधायक डॉ. अजय कुमार सिंह, तारापुर विधायक राजीव कुमार सिंह, मुंगेर मेयर कुमकुम देवी, जमालपुर नगर परिषदक अध्यक्ष पार्वती देवी सहित स्थानीय जनप्रतिनिधि उपस्थित छलथि।
