हालहिमे इसरो प्रमुख एस सोमनाथ कहने छलाह जे जँ हम प्रधानमंत्रीकेँ अन्तरिक्षमे पठा सकी तँ हमरासभकेँ बहुत गर्व होयत। एस सोमनाथक एहि बयान पर कांग्रेस प्रधानमंत्री पर निशाना साधने अछि। कांग्रेस नेता जयराम रमेश सोशल मीडिया पर साझा कयल गेल एकटा पोस्टमे लिखलनि जे “प्रधानमंत्रीकेँ अन्तरिक्षमे जयबासँ पहिने मणिपुर जयबाक चाही।”
मीडिया रिपोर्टक अनुसार, इसरो प्रमुख एस सोमनाथ कहने छलाह जे यदि प्रधानमंत्री मोदी भारतक पहिल मानवयुक्त मिशन गगनयानक अन्तर्गत अन्तरिक्षमे जयबाक इच्छा रखैत छथि तँ हुनका बहुत खुशी होयत। गगनयान वर्ष २०२५ मे प्रक्षेपित होबयवला अछि। इसरो प्रमुखसँ पूछल गेल छल जे यदि प्रधानमंत्री मोदी इसरोक मानवयुक्त मिशनक अन्तर्गत अन्तरिक्षमे जाय चाहैत छथि तँ की हुनका खुशी होयत। एकर जवाबमे एस सोमनाथ कहलनि कि ‘निश्चित रूपसँ ओ एहिसँ खुश हेताह, मुदा हुनका (पीएम मोदी) पर आओर बहुत रास महत्वपूर्ण जिम्मेदारी अछि, जे पूरा केनाइ हुनकर पहिल प्राथमिकता अछि।
मुदा ई एकटा एहन क्षमता अछि जे हम हासिल करय चाहैत छी,आ तेँ मनुष्यकेँ अन्तरिक्षमे भेजबाक क्षमताकेँ एतेक विकसित कयल जाय जाहिसँ ई बहुत सुरक्षित भऽ जाय, आ हम ओकरा प्राप्त करबाक प्रक्रियामे छी।
कांग्रेस मणिपुर हिंसाक मुद्दा पर केंद्र सरकारकेँ घेरबाक प्रयास कऽ रहल अछि। विपक्ष आरोप लगओलक अछि जे प्रधानमंत्री मोदी मणिपुरक हिंसा पर चुप्पी साधने छथि आ राज्यमे शान्ति बहाल करबाक लेल पर्याप्त डेग नहिं उठायल गेल अछि।
मणिपुरमे पछिला साल मईमे जातीय हिंसा भड़कि गेल छल। एहि हिंसामे २०० सँ बेसी लोकक मृत्यु भऽ चुकल अछि आ हजारो लोककेँ विस्थापनक सामना करय पड़ल अछि। बुधदिन राज्यसभामे अपन संबोधनक क्रममे पीएम मोदी मणिपुरक मुद्दा पर सेहो वक्तव्य देलनि आ कहलनि जे केन्द्र सरकार राज्यमे शान्ति बहाल करबाक लगातार प्रयास कऽ रहल अछि।
