अमेरिकाक पूर्व राष्ट्रपति डोनाल्ड ट्रम्प आ यूक्रेनक राष्ट्रपति वोलोदिमिर ज़ेलेंस्कीक बीच वाकयुद्ध तेज भऽ गेल अछि। ट्रम्प ज़ेलेंस्कीकेँ धमकी दैत कहलनि जे रूस आ यूक्रेनक बीच चलि रहल युद्ध हुनका (जेलेंस्की) बिना समाप्त कयल जा सकैत अछि। ओ बुधदिन सोशल मीडिया प्लेटफॉर्म ट्रुथ सोशल पर लिखलनि जे ज़ेलेंस्कीकेँ जल्दीसँ जल्दी बुद्धिमानीसँ आगू बढ़बाक चाही, नहि तँ हुनका लग कोनो देश नहि बचल रहत।
ट्रम्प इहो दावा कयलनि जे रूसक संग युद्ध समाप्त करबाक लेल बातचीत चलि रहल अछि जे केवल हुनकर प्रशासन कऽ सकैत अछि। ई बयान जेलेंस्की द्वारा शिकायत कयलाक बाद आयल अछि जे सऊदी अरबक रियादमे अमेरिकी आ रूसी राजनयिक सभक बैसारमे यूक्रेन शामिल नहि छल। ओ कहलनि जे जँ हुनकर देशकेँ बाहर राखि शान्ति समझौता कयल जायत तँ ओ एकरा स्वीकार नहि करताह। ज़ेलेंस्की हुनका पर हमला करैत कहलनि जे ट्रम्प गलत सूचनाक जालमे रहि रहल छथि। ट्रम्प तुरन्त जवाबी कारवाई करैत ज़ेलेंस्कीकेँ “बिना चुनावक तानाशाह” कहलनि। ओ यूक्रेनमे राष्ट्रपति चुनावक उल्लेख कऽ रहल छलाह, जे युद्धक कारण स्थगित कऽ देल गेल छल।
ट्रम्प एहिसँ पहिने विवादास्पद बयान दऽ चुकल छथि, जाहिमे यूक्रेनपर युद्ध शुरू करबाक आरोप लगाओल गेल छल, जखनि कि वास्तवमे रूस २०२२मे यूक्रेन पर हमला कयने छल।
ट्रम्पक मानब छनि जे अमेरिका यूक्रेनक मुख्य समर्थक अछि, तेँ ओ ज़ेलेंस्कीकेँ रूसक राष्ट्रपति व्लादिमीर पुतिनक संग शान्ति समझौता करबाक लेल बाध्य कऽ सकैत छथि। एम्हर रूसी आ अमेरिकी राजनयिकक बीच चारि घंटा धरि बैसार चलल, जाहिमे अमेरिकी विदेश मंत्री मार्को रुबियो आ रूसक विदेश मंत्री सर्गेई लावरोव शामिल छलाह। दुनू देश वार्ताकेँ सकारात्मक बतौलक आ अपन दूतावासकेँ पूर्ण रूपसँ चालू करबाक लेल सहमत भेल।
ट्रम्प एहि बातपर सेहो अप्रसन्नता व्यक्त कयलनि जे यूरोपक तुलनामे यूक्रेन युद्धमे अमेरिकाकेँ बहुत बेसी आर्थिक बोझ पड़ल छल। ओ कहलनि जे ज़ेलेंस्की अमेरिकासँ ३५० अरब डॉलर प्राप्त करबामे सफल रहलाह, एकटा एहेन युद्ध जे कहियो शुरू नहि हेबाक चाही छल। ट्रम्पक कहब छनि जे यूरोपकेँ ओतेक सहयोग करबाक चाही जतेक अमेरिका दऽ रहल अछि, किएक तँ यूक्रेन अमेरिकासँ बहुत दूर अछि जखन कि यूरोपीय देश पड़ोसी अछि।
ट्रम्प राष्ट्रपति जो बाइडेन पर सेहो निशाना साधैत कहलनि जे बाइडेन यूक्रेनमे शान्ति स्थापित करबाक लेल कोनो प्रयास नहि कयलनि। ओ आरोप लगओलनि जे ज़ेलेंस्की बाइडेनक संग बहुत नीक व्यवहार कयलनि, मुदा हुनकर युद्ध रोकबाक लेल कोनो ठोस पहल नहि कयल गेल।
रूस वर्तमानमे यूक्रेनक लगभग २०% भागपर कब्जा कय लेने अछि, जखनि कि यूक्रेन रूसक कुर्स्क क्षेत्रक मात्र छोट-छोट भागपर नियन्त्रण कयने अछि। अमेरिकी रक्षा मंत्री पीट हेगसेथ कहलनि जे आब यूक्रेनक लेल २०१४क सीमा पर घुरब असंभव अछि, जखनि रूस क्रीमिया पर कब्जा कऽ लेने छल। ओ इहो कहलनि जे यूक्रेनक नाटोमे विलय आब संभव नहि बुझाइत अछि।
