प्रायः पौने पाँच लाख नियोजित शिक्षक बनताह राज्यकर्मी
*
बिहारमे एखनि शिक्षकक सरकारी नौकरीक बहार अछि, नितीश-तेजस्वीक सरकार अपन कयल गेल वादा,जे दस लाखकेँ नौकरी देब, तकर पूर्ति धरल्लेसँ करैत जा रहल अछि आ लगैत अछि जेना सभटा कइए कऽ दम लेत, फलतः एक बेर पुनः नीतीश सरकार चर्चामे अछि।
आब बारी आयल नियोजित शिक्षकक आ बिहारक प्रायः पौने पाँच लाख नियोजित शिक्षक राज्य कर्मचारी बनय जा रहल अछि।
एकरा लेल सड़कपर लाठी सेहो खयने छल, प्रदर्शन कयने छल, नोटिस भेटल छल, मुदा आइ मेहनत सफल देखाई पड़ि रहल अछि। बिहारक ४.७५ लाख नियोजित शिक्षककेँ आब राज्य कर्मचारीक दर्जा भेटत। आ आब ओ लोकनि नियोजित शिक्षकक बदला सहायक शिक्षक कहेथिन।
काल्हि यानी मंगल कऽ नीतीश कैबिनेट एकरा मंजूरी देलक अछि। जनतब दी जे पहिने बिहार स्कूल विशिष्ट शिक्षक नियम २०२३ शिक्षा विभाग द्वारा आनल गेल छल। आइ एहि नियमावली केर नीतीश कैबिनेट मंजूरी दऽ देलक अछि।
बस राज्य कर्मचारीक दर्जाक लेल ई काज करय पड़त आ एहू लेल तीनटा अवसर भेटत।
बिहार स्कूल विशिष्ट शिक्षक नियम २०२३क अन्तर्गत नियोजित शिक्षककेँ राज्य कर्मचारीक दर्जा देल जायत।
कैबिनेट द्वारा अनुमोदित बिहार स्कूल विशिष्ट शिक्षक नियम २०२३क अनुसार नियोजित शिक्षककेँ राज्यक कर्मचारी बनबाक लेल परीक्षा देबय पड़त।
एहि परीक्षाक नाम सक्षमता परीक्षा देल गेल अछि। ई सक्षमता परीक्षा एक सालक भीतर लेल जायत। पास होबय केर तीन टा अवसर भेटत। जँ पास भऽ जाइत छी तँ अहाँकेँ राज्यक कर्मचारीक दर्जा भेटत। मुदा किनसियाइत जँ कियो तेसरो प्रयास पर्यंत पास नहिं होइत छथि तँ हुनका सेवासँ मूक्त कऽ देल जायत।
स्थानीय निकायक विभिन्न स्तर (पंचायती राज/पंचायती राज) नगर निकाय द्वारा नियुक्त सभटा शिक्षककेँ आब “सहायक शिक्षक” कहल जायत बशर्ते ओ विभाग द्वारा आयोजित सक्षमता परीक्षा उत्तीर्ण करथि।
एकर अर्थ अछि जे नव नियमसँ जे शिक्षक राज्य कर्मचारीक दर्जा प्राप्त करत, हुनका वेतन ग्रेडक लाभ भेटत। जखन ई नियम लागू होयत, तखन प्राथमिक शिक्षकक मूल वेतन (कक्षा १ सँ ५) २५,००० रुपैया अछि।
माध्यमिक शिक्षकक (कक्षा ६ सँ ८) मूल वेतन २८,००० रुपैया अछि। तहिना उच्चतर माध्यमिक शिक्षक (कक्षा ९ आ १०) केँ ३१ हजार रुपया एवं प्लस टू शिक्षककेँ ३२ हजार टका मूल वेतन अछि। एकरा संग, पदोन्नति लेल समय अवधि आठ वर्ष देल गेल अछि।
