ईरानक विदेश विभाग अमेरिकी विदेश मंत्री एंटनी ब्लिंकनक एहि दावाकेँ खारिज कऽ देलक जे तेहरान पूर्व राष्ट्रपति डोनाल्ड ट्रम्प सहित अमेरिकी सरकारक वरिष्ठ अधिकारीसभक लेल खतरा अछि।
समाचार एजेंसीक रिपोर्टक अनुसार, ईरानी विदेश मंत्रालयक प्रवक्ता नासिर कनानी बृहस्पतिकेँ एकटा बयानमे ब्लिंकनक दावा केर “हास्यास्पद आ पूरा तरहसँ निराधार” कहलनि । ओ कहलनि जे एहन दावा “राजनीतिसँ प्रेरित” छल।
बुधदिन एनबीसीक “टुडे” कार्यक्रममे एकटा साक्षात्कारक क्रममे ब्लिंकन कहलनि जे अमेरिका “वर्तमान आ पूर्व वरिष्ठ सरकारी अधिकारीसभक विरुद्ध ईरानी खतरापर गहन नजरि राखि रहल अछि। ‘
अमेरिकी विदेश मंत्री कहलनि जे एहि मामलाकेँ “बहुत, बहुत गम्भीरतासँ लेल जा रहल अछि।
कनानी जबाब दैत ब्लिंकनकेँ कहलनि, “क्षेत्रक वर्तमान अशांत परिस्थितिमे, एहन झूठ आ राजनीतिक आरोप कमसँ कम इजरायलक समर्थन आ मदति करबाक अमेरिकी सरकारक अंतर्राष्ट्रीय दायित्वकेँ कम नहि कऽ सकैत अछि।”
ईरानी अधिकारी कहलनि जे “वैश्विक जनमत” संयुक्त राज्य अमेरिका आ ओकर अधिकारीसभकेँ “एहन मानवीय आपदाक लेल जिम्मेदार मानैत अछि।”
हालहिमे डोनाल्ड ट्रम्पक अभियान संचार निदेशक दावा कयने छलाह जे अमेरिकी खुफिया एजेंसीसभ पूर्व राष्ट्रपतिक जीवनकेँ ईरानसँ कथित खतराक सूचना देलक अछि। ७८ वर्षीय रिपब्लिकन राष्ट्रपति पदक उम्मीदवारपर हालक मासमे दूटा स्पष्ट हत्याक प्रयास कयल गेल अछि।
ट्रम्पक अभियान संचार निदेशक स्टीवन चेउंग मंगलदिन कहलनि, “पूर्व राष्ट्रपति ट्रम्पकेँ आइ राष्ट्रीय खुफिया निदेशकक कार्यालय द्वारा संयुक्त राज्य अमेरिकामे अस्थिर आ अराजकता बोयबाक प्रयासमे ईरानसँ हुनक हत्याक वास्तविक धमकीक विषयमे जानकारी देल गेल।”
