ईरानक राष्ट्रपति मसूद पेजेशकियान दोहरओलनि जे ईरान कहियो परमाणु हथियार बनयबाक प्रयास नहि कयलक। ओ सर्वोच्च नेता अली खामेनेई’क एहेन हथियारपर प्रतिबन्ध लगयबाक धार्मिक फरमानक हवाला देलनि।
रिपोर्टक अनुसार पेजेशकियन ईरानकेँ परमाणु कार्यक्रमक शांतिपूर्ण प्रकृतिक पुष्टिक लेल अंतर्राष्ट्रीय परमाणु ऊर्जा एजेंसी (आईएईए) केर संग जारी सहयोगक उल्लेख कयलक।
ईरानी राष्ट्रपति द्वारा जारी एकटा बयानक अनुसार, पेजेशकियन नार्वेक प्रधानमन्त्री जोनास गहर स्टोरे’क सङ्ग फोनपर बातचीतक क्रममे ई टिप्पणी कयलनि। ओ लोकनि द्विपक्षीय सम्बन्ध आ क्षेत्रीय मुद्दा पर चर्चा कयलनि।
ईरानी राष्ट्रपति इजरायल पर क्षेत्रीय तनावक मुख्य कारण होयबाक आरोप लगओलनि। ओ कहलनि “तेल अवीव ईरानक परमाणु गतिविधिकेँ सुरक्षा खतराक रूपमे चित्रित करबाक मनगढ़ंत दावा करैत अछि”।
पेजेशकियन इहो कहलनि जे ईरान तनाव आ संघर्षकेँ हानिकारक मानैत अछि, मुदा ओ अपन सुरक्षा आ हितक विरुद्ध कोनो खतराक दृढ़तासँ जवाब देत। ओ ईरान आ नॉर्वेक बीच सकारात्मक सम्बन्धक प्रशंसा कयलनि।
ईरानी वक्तव्यक अनुसार, नॉर्वेक प्रधानमन्त्री ईरानक सङ्ग मैत्रीपूर्ण सम्बन्ध बनेबाक ओस्लोक इच्छा व्यक्त कयलनि आ पश्चिम एशिया क्षेत्रमे मुद्दासभक शांतिपूर्ण समाधानक स्वागत करैत एहि सम्बन्धमे समर्थन देलनि।
जनतब जे अमेरिकी राष्ट्रपति डोनाल्ड ट्रम्प शुक्रदिन कहलनि जे ओ ईरानक परमाणु मुद्दापर ओकर सङ्ग बातचीत करय चाहैत छथि आ बृहस्पतिकेँ ईरानी नेतृत्वकेँ एकटा पत्र पठौलनि।
एम्हर ईरानक सर्वोच्च नेता अली खामेनेई शनिकेँ कहलनि जे किछु ‘धमकाबयवाला’ शक्तिसभ द्वारा वार्तापर जोर देबाक उद्देश्य मुद्दाक समाधान नहि अछि, बल्कि इस्लामी गणराज्य पर अपन माँग थोपब अछि।
खामेनेईक कार्यालय द्वारा जारी फुटेजक अनुसार, खामेनेई शनिदिन तेहरानमे सरकारी अधिकारीसभक सङ्ग बैसारक क्रममे ई टिप्पणी कयलनि। हुनकर बयान विशेष रूपसँ अमेरिकी राष्ट्रपति डोनाल्ड ट्रम्पक ईरानक परमाणु कार्यक्रम पर वार्ताक अपीलक प्रतिक्रियामे छल। ईरानी नेता कहलनि, “हुनकर वार्ता मुद्दा केर समाधान करय लेल नहि अछि, बल्कि दोसर पक्ष पर वर्चस्व स्थापित करय आ अपन इच्छा थोपय लेल अछि।”
