इंद्रप्रस्थ मैथिल मंच ट्रस्ट, रोहिणी, दिल्लीक चर्चित सरस्वती पूजनोत्सवक तैयारी पूरा

दिल्ली समदिया!! इंद्रप्रस्थ मैथिल मंच ट्रस्ट, रोहिणी, दिल्ली, विगत 26 वर्षसॅं सरस्वती पूजाक आयोजन खूब वृहत स्तर पर करैत आबि रहल अछि। अपन विशेष पूजा आयोजन लेल चर्चित एहि संस्थाक कार्यक्रम मिथिलाक संस्कृतिक सेहो नीकसॅं प्रचार-प्रसार करैत अछि।

संस्थाक संस्थापक एवं ट्रस्टी सुनीत ठाकुर जनतब देलनि कि एहि बेरक सरस्वती पूजनोत्सव तैयारी लगभग पूरा भऽ गेल अछि। हर वर्षक भांति पूजामे, 11टा पुरहित आ 11 टा विद्यार्थी पूरा दिन विभिन्न प्रकारक पूजा-हवन आदिमे संलग्न रहथिन।

आगू ओ कहलनि कि, कार्यक्रमक प्रारंभ एक दिन पहिने साॅंझमे अधिवास एवं सुन्दरकाण्ड पाठसॅं प्रारंभ होइत अछि। श्रीअखिलेशानंद जी महाराज जे संस्थाक ट्रस्टी सेहो छथि, मैथिलीमे सुन्दरकाण्ड पाठ करैत छथि।

सरस्वती पूजाक दिन प्रातः स्वास्तिवचन , गणेश स्तुति पाठ आ दुर्गा सप्तशती पाठक बाद महासरस्वती पूजन आरंभ होइत अछि। तत्पश्चात महासरस्वती सहस्त्र पाठ एवं स्तोत्रक कार्यक्रम होइत अछि। सवा लाख महासरस्वती यज्ञाहुति केर विशेष आयोजन पूजा पर बैसल सभ विद्यार्थी एवं पुरहित मिलि करैत छथि।

संस्थाक संस्थापक ट्रस्टी एवं संचालक तृप्ति एन झा जनतब देलनि कि बेरूपहर एक बजेसॅं बच्चा सभक कार्यक्रम जाहिमे ज्ञान विज्ञान, चित्रकला, फैंसी ड्रेस प्रतियोगिता, गायन, कविता पाठ, नृत्य आदि समाहित रहैत छैक, संग-संग चलैत रहैत छैक।

संध्या आरतीक पश्चात सांस्कृतिक कार्यक्रम होइत अछि जाहिमे पिछला किछु वर्षसॅं बच्चा सभकेॅं सहभागिता मुख्य रुपसॅं रहैत अछि। संस्थाक स्मारिका “प्रेरणा” केर विमोचन सेहो होइत अछि।

एहि क्रममे अनवरत प्रसाद वितरण, दिन एवं रातुक प्रसाद भोजनक भंडारा चलैत रहैत छैक जाहिमे हजारों केर संख्यामे भक्तगण प्रसाद ग्रहण करैत छथि।

अगिला दिन विशेष प्रसाद वितरण एवं विसर्जनक पश्चात नगर भ्रमण एवं माॅं केर प्रतिमा विसर्जनक संग कार्यक्रम सम्पन्न होइत अछि।

संस्थाक अध्यक्ष एस आर सिंह, एवं महासचिव आर के मिश्रा जनतब देलनि कि , 2015 सॅं लगातार कन्यादान केर कार्यक्रम आयोजित भ’ रहल अछि, एहि वर्ष शनि रहलाक कारण कार्यक्रम सरस्वती पूजाक दिन, रात्रिमे आयोजित करबाक निर्णय भेल अछि।

एहि सभक अतिरिक्त संस्थाक संस्थापक ट्रस्टी अजित सिंह जनतब दैत कहलनि जे सरस्वती पूजाक संग इंद्रप्रस्थ मैथिल मंच दिल्लीक विशेष चर्चित छठि पूजा, होली मंगल मिलन समारोह आदि केर आयोजन सेहो वृहत स्तर पर ट्रस्ट करैत आबि रहल अछि। दिल्ली सन महानगरमे मिथिलाक पहिचान आत्मीयताक अमृतधाराक संग अविरल बहबैत संस्था साझा प्रयाससॅं , सौहार्दक एक सूत्रमे बाॅंधबाक प्रति वचनबद्ध पूर्ण निरंतरताक संग जुटल अछि।