आरबीआई द्वारा साझा कयल गेल नवीनतम आंकड़ासँ पता चलैत अछि जे देशक विदेशी मुद्रा भंडारमे वृद्धि भेल अछि। भारतीय रिजर्व बैंक (आरबीआई)क अनुसार, २९ नवम्बर धरि भारतक विदेशी मुद्रा भंडार १.५१ अरब डॉलर बढ़ि कऽ ६५८.०९ अरब डॉलर भऽ गेल। २२ नवम्बर धरि भारतक विदेशी मुद्रा भंडार ६५६.५८ अरब डॉलर छल।
भारतीय रिजर्व बैंक (आरबीआई) द्वारा जारी साप्ताहिक सांख्यिकी डेटासँ जानकारी भेटल जे ई वृद्धि मुख्य रूपसँ विदेशी मुद्रा संपत्ति (एफसीए) मे वृद्धिक कारण भेल छल, जे २.०६ अरब डॉलर बढ़ि कऽ ५६८.८५ अरब डॉलर भऽ गेल। एम्हर देशक सोनाक भंडारमे ५९.५ करोड़ डॉलरक गिरावट आयल, जाहिसँ कुल भंडार ६६.९७ अरब डॉलर भऽ गेल। विशेष आहरण अधिकार (एसडीआर) मे २.२ करोड़ डॉलरक वृद्धि भेल, जे आब कुल १८.०० अरब डॉलर आ अंतर्राष्ट्रीय मुद्रा कोष (आईएमएफ) मे आरक्षित स्थिति सेहो २.२ करोड़ डॉलर बढ़ि कऽ ४.२५ अरब डॉलर भऽ गेल अछि।
भारत विदेशी मुद्रा भंडारक मामिलामे दुनियाक चारिम देशक रूपमे जानल जाइत अछि, जाहिमे सबसँ बेसी विदेशी मुद्रा भंडार अछि। चीन ३,५७१ अरब डॉलरक सङ्ग सूचीमे सभसँ ऊपर अछि। एकर बाद जापान १,२३८ अरब डॉलर आ स्विट्जरलैंड ९५२ अरब डॉलरक संग दोसर स्थान पर अछि। एहिसँ पहिने सितम्बरक अन्त धरि भारतक विदेशी मुद्रा भंडार ७०४.८८५ अरब डॉलरक सर्वकालिक उच्चतम स्तर पर पहुँचि गेल छल, जे अर्थव्यवस्थाक मजबूत आर्थिक स्थितिक संकेत दैत अछि।
रुपयामे अस्थिरताकेँ नियंत्रित करबाक लेल केन्द्रीय बैंक विदेशी मुद्रा भंडारक उपयोग करैत अछि। जखनि कखनो विदेशी निवेशक द्वारा भारतीय शेयर बाजारमे बिकवाली कऽ पैसा बाहर निकालल जाइत अछि तऽ डॉलरक माँग बढ़ि जाइत छैक, जाहिसँ रुपयाक मूल्य पर दबाव बढ़ि जाइत छैक। एहन स्थितिमे केन्द्रीय बैंक डॉलरक आपूर्तिमे वृद्धि कऽ रुपयामे उतार-चढ़ावकेँ नियंत्रित करैत अछि।
