जी-२० देशमे ७ प्रतिशतक विकास दरक सङ्ग २०२४मे भारतक अर्थव्यवस्था सबसँ तेज गतिसँ बढ़बाक आशा अछि।
जी-२० देशमे भारतक बाद इंडोनेशिया (५ प्रतिशत) आ चीन (४.८ प्रतिशत) अछि।
ब्राजीलमे चलि रहल जी-२० शिखर सम्मेलनमे रैंकिंग जारी भेलाक बाद एक्स पर पोस्ट कयल गेल भारत सरकारक वक्तव्यमे कहल गेल अछि, “अनुमानित ७ प्रतिशत जीडीपी वृद्धिक सङ्ग, भारत जी-२० देशसभमे अग्रणी बनल अछि। ई उपलब्धि भारतक मजबूत अर्थव्यवस्थाकेँ उजागर करैत अछि, जे वैश्विक चुनौतिसभक बीच देशक विकास तेज गतिसँ आ ओकर मजबूतीकेँ प्रदर्शित करैत अछि।”
जीडीपी वृद्धिमे ३.६ प्रतिशतक विकास दरक सङ्ग रूस चारिम स्थानपर अछि आ ब्राजील ३ प्रतिशतक सङ्ग पाँचम स्थानपर अछि।
ओतहि अफ्रीका क्षेत्र ३ प्रतिशतक विकास दरक सङ्ग छठम आ अमेरिका २.८ प्रतिशतक विकास दरक सङ्ग सातम स्थानपर अछि।
२०२४मे अन्य पश्चिमी देश जेना कनाडा १.३ प्रतिशत, फ्रांस, यूरोपीय संघ आ यूके १.१ प्रतिशतक वृद्धिक अपेक्षा अछि। इटली आ जापानक क्रमशः ०.७ प्रतिशत आ ०.३ प्रतिशतक वृद्धि होयबाक आशा अछि।
ऑस्ट्रेलियाक सकल घरेलू उत्पाद विकास दर एहि साल १.२ प्रतिशत होयबाक अनुमान अछि।
विकसित देशसभमे जर्मनीक प्रदर्शन सबसँ खराब ० प्रतिशत होयबाक आशा अछि।
एम्हर प्रधानमंत्री नरेन्द्र मोदी १८ आ १९ नवम्बरकेँ आयोजित होबयवला जी-२० २०२४क लेल ब्राजीलक रियो डी जेनेरियो पहुँचलाह, जतय हुनक गर्मजोशीसँ स्वागत कयल गेल। मध्य पूर्व आ यूरोपमे चलि रहल जलवायु संकट आ संघर्षक बीच आयोजित एहि शिखर सम्मेलनक ध्यान भूख, गरीबी आ असमानता, सतत विकास आ वैश्विक शासन सुधारक विरुद्ध लड़ाइ पर अछि।
जी-२० केर सभ १९ सदस्य देश – अर्जेंटीना, ऑस्ट्रेलिया, ब्राजील, कनाडा, चीन, फ्रांस, जर्मनी, भारत, इंडोनेशिया, इटली, जापान, कोरिया, मेक्सिको, सऊदी अरब, दक्षिण अफ्रीका, रूस, तुर्की, ब्रिटेन आ अमेरिका आ यूरोपीय संघ – दू दिवसीय शिखर सम्मेलनमे भाग लऽ रहल अछि।
