‘इंडिया’ गठबंधनक पैघ नेता आब सरकार बनेबाक प्रयास करबाक बदला एकटा मजबूत विपक्षक बात कऽ रहल छथि। एहि क्रममे इंडिया गठबंधनक दोसर सबसँ पैघ घटक समाजवादी पार्टी सेहो संसदमे मजबूत विपक्षक बात कयलक अछि।
समाजवादी पार्टीक प्रमुख अखिलेश यादव मजबूत विपक्षक बात कयलनि अछि। एहिसँ पहिने इंडिया गठबन्धन अपन शक्ति बढ़यबाक भरिसक प्रयास कयलक। एहि लेल आन दलकेँ सेहो आमंत्रित कयल गेल छल। ओना आब अखिलेश यादव विपक्ष केर मजबूत करबाक बात कहय लागल छथि। ओ सेनामे अग्निवीरक भर्तीक मुद्दा सेहो उठौलनि।
कांग्रेस आ समाजवादी पार्टी लोकसभा चुनावक दौरान अग्निवीर योजनाक विरोध कयने छल। दुनू दल कहलक जे जँ ओ सत्तामे अबैत छथि तँ अग्निवीर योजनाकेँ रोकि देताह। विपक्षमे बैसबाक स्पष्ट संकेत दैत अखिलेश यादव कहैत छथि जे एहि बेर विपक्ष मजबूत होयत। दिल्लीमे संवाददाता सभसँ बातचीत करैत ओ कहलनि जे एहि बेर विपक्ष मजबूत होयत आ विपक्षक आवाज नहिं दबायल जायत। समाजवादी पार्टी अग्निवीर व्यवस्थाकेँ कहियो स्वीकार नहिं कए सकैत अछि।
दोसर दिस, एनडीए केर घटक दल इंडिया गठबंधनक विषयमे लागल अटकलकेँ खारिज कऽ देलक। चन्द्रबाबू नायडूक पार्टीक राष्ट्रीय प्रवक्ता प्रेम कुमार जैन स्पष्ट रूपसँ कहलनि जे हुनकर पार्टी एनडीएकेँ अपन समर्थन देलक अछि। ओ कहलनि जे इंडिया गठबंधन किछु बाजय, मुदा ओ एनडीएक संग छथि। संगहि नायडूक पार्टीक कहब अछि जे चन्द्रबाबू नायडू १२ जूनकेँ आन्ध्र प्रदेशक मुख्यमन्त्रीक रूपमे शपथ लेबाक सम्भावना अछि।
दरअसल, आंध्र प्रदेश विधानसभा चुनावमे चंद्रबाबू नायडूक पार्टीकेँ बहुमत भेटल अछि। भारतीय जनता पार्टी आ तेलुगु देशम पार्टी संयुक्त रूपसँ विधानसभा चुनाव लड़लक आ एनडीए एतय बम्पर जीत हासिल कयलक अछि। चन्द्रबाबू नायडूक शपथग्रहण समारोह केन्द्रमे सरकारक गठनक बाद होयत। एहि आयोजनमे प्रधानमंत्री नरेन्द्र मोदीकेँ सेहो आमंत्रित कयल जायत।
ओतहि भाजपाक राष्ट्रीय अध्यक्ष जेपी नड्डा केंद्रीय गृह मंत्री अमित शाह, रक्षा मंत्री राजनाथ सिंह आर पार्टी नेताक संग केंद्र सरकारक गठनक रूपरेखा आ तैयारी पर महत्वपूर्ण बैठक कऽ रहल छथि। ई बैसार भाजपाक राष्ट्रीय अध्यक्ष जेपी नड्डाक निवास पर भऽ रहल अछि। बैसारमे भाजपाक राष्ट्रीय महासचिव बीएल संतोष, राष्ट्रीय महासचिव विनोद तावड़े आ तरुण चुग आ केन्द्रीय मंत्री मनसुख मंडाविया उपस्थित छलथि।
