‘भारत-ईरानक संबंध पाँच हजार साल पुरान’: ईरानक सुप्रीम लीडरक प्रतिनिधि

नई दिल्ली । समदिया

भारतमे ईरानक सर्वोच्च नेताक प्रतिनिधि अब्दुलमजीद हकीम इलाही अमेरिकी राष्ट्रपति डोनाल्ड ट्रंप द्वारा ईरान पर देल गेल ताजा धमकी सभ आ युद्धक स्थिति केर ल’ क’ मिडियामे विशेष बयान देलनि। अब्दुलमजीद बिहारक राजधानी पटनामे अयातुल्लाह अली खामेनेई लेल प्रार्थना कयलनि।

ईरानक पूर्व सर्वोच्च नेता अयातुल्लाह अली खामेनेईकेँ ल’ क’ सर्वोच्च नेताक प्रतिनिधि अब्दुलमजीद हकीम इलाही कहलनि, ‘अयातुल्लाह अली खामेनेई मुसलमान सभक संग-संग धार्मिक नेता सभक सेहो आध्यात्मिक नेता छलथि आ ओ बेजुबान लोकक आवाज छलथि। मात्र शिया वा अहले सुन्नत नहि, अपितु बहुतो आ लाखो हिन्दू आ ईसाई सेहो हुनका स्नेह करैत छथि। जहियासँ हुनक शहादतक खबरि हरेक ठाम पसरल, लोक बाहर आयल आ ओ अपन सहानुभूति आ खामेनेई संग अपन एकजुटता देखौलनि आ हुनका लेल बहुतो कार्यक्रम कएल गेल। लोक हुनका लेल अपन नोर बहा रहल छथि।’

ओ कहला कि असलमे, हम जे कह’ चाहैत छी से ई अछि कि एहेन प्रोग्राम राजनीतिक प्रोग्राम नहि छी कारण खामेनेई एकटा आध्यात्मिक नेता छलाह आ कोनो आध्यात्मिक नेता चाहे ओ क्रिश्चियन होथि वा हिंदू वा आन कोनो, जखनि ओ गुजरि गेलाह वा मारल गेलाह, तऽ सभ लोक आयत आ हुनका लेल शोक मनायत।

ट्रंपक मंगलदिनवाला धमकी आ ईरानमे ताजा परिस्थितिकेँ ल’ क’ हकीम इलाही कहलथिन, ‘ई कोनो नव बात नहि अछि, ओ शायद किछु दिन पहिने सेहो ई जारी कयने छलाह। 10 दिन पहिने ओ कहलथि जे मात्र 48 घंटा आ ओकरा बाद ओ एकरा बदलि देलथि आ आब 10 दिन भ’ गेल अछि।’ ओ कहला कि ई 10 दिन खत्म होब’ वाला अछि, हम देखब कि की भ’ रहल अछि। असलमे, ई युद्ध राष्ट्रपति ट्रंपक ईरानक विरुद्ध युद्ध नहि अछि। सभ लोक जनैत अछि जे ई युद्ध अमेरिकनक हितमे नहि अछि। ई एकटा निजी युद्ध छल आ आब ओ एकरासँ निपटि रहल छथि आ ओ एहिसँ बाहर निकलय चाहैत छथि। मुदा, हुनका नहि पता जे ओ एहिसँ कोना बाहर निकलि सकैत छथि।

जखनि हुनका सँ पूछल गेल कि होर्मुज केर दशा आ जे भ’ रहल अछि, एहिमे भारत केर भूमिकाकेँ ओ कोना देखैत छथि ?

ओ कहलनि, “होर्मुज केर हालत अखुनका नहि अछि, ई हजारो साल पहिले केर बात अछि। ई ईरानक नियंत्रणमे छल आ ओकरा पर ओकर प्रभुत्व छल आ आब ओ एहिकेँ जारी राखत। एहि युद्धसँ पहिने कोनो संकट, कोनो समस्या नहि छल, मुदा आब ओ एहि युद्धकेँ ठाढ़ कय देने छथि। होर्मुजक हालतक माध्यमसँ बहुत रास संकट आ समस्यासभ ठाढ़ कय देने छथि। हमरा उम्मीद अछि जे ई बहुत जल्दी खत्म भऽ जायत।”

भारतक संग संबंध पर हकीम इलाही कहलनि जे भारतक संग हमरा सभक बहुत गहींर संबंध अछि। हम कहि सकैत छी जे भारत आ ईरानक बीच दोस्ती सेहो एहि समय बहुत नीक अछि आ एकर जड़ि 5,000 साल पुरान अछि।