प्रधानमंत्री नरेन्द्र मोदी मंगलदिन हैदराबाद हाउसमे जमैकाक प्रधानमन्त्री एंड्रयू होलनेसक सङ्ग द्विपक्षीय वार्ता कयलनि। दुनू नेता भारत आ जमैकाक बीच द्विपक्षीय सम्बन्धपर चर्चा कयलनि।
होलनेसक नई दिल्ली यात्रा ऐतिहासिक महत्वक अछि। ओ जमैकाक पहिल प्रधानमन्त्री छथि जे भारत आयल छथि। हुनकर चारि दिवसीय यात्रा ३ अक्टूबर धरि चलत।
एहिसँ पहिने होलनेस राजघाट पर महात्मा गाँधीकेँ पुष्पांजलि अर्पित कयलनि।
सोशल मीडिया प्लेटफॉर्म एक्स पर फोटो साझा करैत विदेश मंत्रालय लिखलक, “राष्ट्रपिताक सम्मान! जमैकाक प्रधानमन्त्री एंड्रयू होलनेस आइ राजघाट पर महात्मा गाँधीकेँ पुष्पांजलि अर्पित कयलनि।”
जमैकाक प्रधानमंत्री राष्ट्रपति द्रौपदी मुर्मू, उपराष्ट्रपति जगदीप धनखड़ आ अन्य उच्च पदस्थ अधिकारी आ व्यापारिक नेतासँ सेहो भेंट करताह।
विदेश मंत्रालय कहलक, “एहि यात्रासँ आर्थिक सहयोग बढ़ेबाक आ जमैका एवं भारतक बीच दीर्घकालिक सम्बन्धकेँ मजबूत होयबाक आशा अछि।”
होलनेसक भारत यात्राक दौरान कतेको समझौता ज्ञापन (एमओयू) पर हस्ताक्षर होयबाक आशा अछि, जे द्विपक्षीय सहयोगकेँ आओर मजबूत करत।
भारत आ जमैकाक बीच सांस्कृतिक आ ऐतिहासिक सम्बन्ध गहींर अछि। दुनू देश साझा औपनिवेशिक अतीत, लोकतांत्रिक मूल्यक प्रति प्रतिबद्धता आ क्रिकेटक प्रति जुनून साझा करैत अछि। एहि यात्रासँ भारत-जमैकाक बीच कूटनीतिक सम्बन्धकेँ बढ़ावा भेटबाक आशा अछि।
जनसंख्याक एकटा छोट हिस्सा होयबाक बादो भारतीयलोकनिक जमैका पर सांस्कृतिक आ सामाजिक जीवन पर गहींर प्रभाव पड़ल अछि।
१९९५मे जमैका सरकार देशक सामाजिक आ आर्थिक विकासमे भारतीयलोकनिक योगदानक सम्मानमे १० मईकेँ भारतीय धरोहर दिवसक रूपमे घोषित कयलक।
१ मार्च १९९८ केँ जमैकामे राष्ट्रीय भारतीय संस्कृति परिषदक गठन कयल गेल छल। ई भारतीय सङ्घक छात्र सङ्गठन अछि जकर उद्देश्य भारतीय संस्कृतिक संरक्षण आ संवर्धन करब अछि।
