शराब घोटालामे गिरफ्तार दिल्लीक मुख्यमंत्री आ आम आदमी पार्टी (आप) केर राष्ट्रीय संयोजक अरविंद केजरीवाल पर अमेरिकी टिप्पणी पर भारत कड़ा आपत्ति जतौलक अछि। भारत एकरा आन्तरिक मामिला बताबैत सम्मान करबाक लेल कहलक अछि।
दिल्लीमे विदेश मंत्रालय अमेरिकाक कार्यवाहक उप-प्रमुख ग्लोरिया बर्बेनाकेँ तलब कयलक। कहल जा रहल अछि जे ई बैसार लगभग ४० मिनट धरि चलल।
विदेश मंत्रालय केर प्रवक्ता रणधीर जायसवाल एकटा बयानमे कहलनि, “भारतमे किछु कानूनी कार्यवाहीक बारेमे अमेरिकी विदेश विभागक प्रवक्ता द्वारा देल गेल टिप्पणी पर हम कड़ा आपत्ति जताबैत छी।”
ओ आगू कहलनि “कूटनीतिमे राज्यसभसँ दोसरक सम्प्रभुता आ आन्तरिक मामिलाक सम्मान करय केर अपेक्षा कयल जाइत अछि। संगहि लोकतंत्रक मामिलामे ई दायित्व आओर पैघ भऽ जाइत अछि। अन्यथा, ई गलत मिसाल स्थापित कऽ सकैत अछि।” आगू, ई कहल गेल अछि जे भारतक कानूनी प्रक्रिया एकटा स्वतंत्र न्यायपालिका पर आधारित अछि।
बतबैत चली जे अमेरिकी विदेश विभागक प्रवक्ता एकटा बयान जारी कऽ कहने रहथि जे हम भारतमे मुख्य विपक्षी दलक नेतासभक गिरफ्तारी आ कार्रवाईपर निष्पक्ष जाञ्चक अपेक्षा करैत छी।
एहिसँ पहिने जर्मनी अरविन्द केजरीवालक गिरफ्तारीपर प्रतिक्रिया देने छल। जकर बाद भारत जर्मन दूतावासक एकटा वरिष्ठ राजनयिककेँ बजौलक आ आम आदमी पार्टीक नेतापर देल गेल बयानक विरुद्ध कड़ा विरोध दर्ज कयलक। जकरा ओ देशक आन्तरिक मामिलामे “घोर हस्तक्षेप”क रूपमे वर्णित कयलनि।
