दिल्ली चुनावमे इंडिया ब्लॉक ढ़हि गेल अछि। जतय कतेको दल अरविन्द केजरीवालक आम आदमी पार्टी (आप)केँ समर्थन देबाक बात कऽ रहल अछि, ओतहि दोसर दिसि कांग्रेस पूर्ण रूपसँ अलग-थलग अछि। आम आदमी पार्टी (आप)क राष्ट्रीय संयोजक अरविन्द केजरीवाल शनिदिन हुनका समर्थन देबाक लेल दलसभकेँ धन्यवाद देलनि आ कांग्रेसकेँ भारतीय जनता पार्टी (भाजपा)क मोहरा कहलनि।
अरविंद केजरीवाल कहलनि जे दिल्ली विधानसभाक चुनाव आम आदमी पार्टी आ भाजपाक बीच भऽ रहल अछि। केजरीवाल दिल्ली चुनावमे हुनका समर्थन देबाक लेल सभ दलकेँ धन्यवाद देलनि। पश्चिम बंगालक मुख्यमंत्री ममता बनर्जी आ समाजवादी पार्टीक प्रमुख अखिलेश यादवकेँ धन्यवाद दैत ओ कहलनि, “मीडिया देखबैत अछि जे उद्धव ठाकरे सेहो समर्थन कऽ रहल छथि। समर्थन देनिहार सभ दल आ जनताकेँ धन्यवाद। ई इंडिया ब्लॉकक चुनाव नहि अछि। ई चुनाव आम आदमी पार्टी आ भाजपाक बीच अछि।”
दिल्लीक मुख्यमंत्री अरविन्द केजरीवाल शनिदिन कांग्रेसक उम्मीदवार संदीप दीक्षितकेँ भाजपाक मोहरा बतौलनि आ कहलनि जे भाजपा जे कहैत अछि से ओ करैत छथि। जँ भाजपा कहैत अछि उठ तऽ उठ आ बैसि तऽ बैसैत छथि।संदीप दीक्षित भाजपाक मोहरा छथि, मानहानिक मुकदमा दायर कऽ रहल छथि तऽ करथि।
अरविन्द केजरीवाल अपन संबोधनमे इहो स्पष्ट कयलनि जे दिल्ली विधानसभा चुनाव इंडिया ब्लॉकक बैनरमे नहि लड़ल जा रहल अछि। आम आदमी पार्टी आ भाजपाक बीच सीधा मुकाबला अछि आ जँ आन दल आम आदमी पार्टीकेँ समर्थन कऽ रहल अछि तखन ई हुनकर अपन व्यक्तिगत राय आ विचार अछि।
