पटनाक गांधी मैदानमे सनातन महाकुंभक आयोजन काल्हि कयल गेल। धीरेन्द्र शास्त्री पुनः एतय हिन्दू राष्ट्र पर अपन विचार व्यक्त कयलनि। ओ कहला जे जातिवादसँ ऊपर उठिकेँ राष्ट्रवाद जरूरी अछि।
राजधानीक ऐतिहासिक गांधी मैदानमे रविदिन (६ जुलाई) ‘सनातन महा कुंभ’ केर भव्य आयोजन कयल गेल। एहि अवसर पर देश भरिसँ संत, भक्त आ धर्मगुरु लोकनिक जुटान भेल। कार्यक्रमकेँ नेतृत्व पूर्व केंद्रीय मंत्री आ भाजपा नेता अश्विनी चौबे कयलनि। सनातन महाकुंभ मंच पर धीरेन्द्र शास्त्रीक संग बिहारक राज्यपाल आरिफ मोहम्मद खान सेहो उपस्थित छलथि।
सनातन महाकुंभ पहुँचल बागेश्वर धामक मुख्य पुरोहित धीरेन्द्र शास्त्री एक बेर फेर हिन्दू राष्ट्रक लेल आवाज उठौलनि। ओ कहलनि जँ भारत हिन्दू राष्ट्र बनत तऽ पहिल राज्य बिहार होएत। ओ कहलनि जे बिहारक बताह लोक, एकटा बात याद राखब, हम सब हिन्दू छी, ताहि लेल हम सब एहि सनातन पावनिमे छी।
जातिवाद आ क्षेत्रवादकेँ लक्ष्य करैत धीरेन्द्र शास्त्री कहलनि जे कतहु भाषा पर, कतहु जाति पर आ कतहु क्षेत्रवाद पर झगड़ा होइत अछि। हमर एकटा प्रार्थना मात्र अछि, हिन्दूकेँ नहि कटय दियौ।जातिवादकेँ छोड़ि राष्ट्रवादक लेल जीबय पड़त।
बाबा बागेश्वर अपन भाषणमे कहलनि जे कतेको शक्ति गजवा-ए-हिन्दक निर्माण करय चाहैत अछि, हमर सभक एकटा सपना अछि जे ई भगवा-ए-हिन्द होय। ओ इहो कहलनि जे हमरा सभके कोनो मुसलमान वा ईसाईसँ कोनो दिक्कत नहि अछि, बल्कि ओहि हिन्दूसँ अछि जे जातिक नाम पर लोकक बंटवारा करैत अछि।
तिरंगाकेँ सम्मान करैत शास्त्री कहलनि जे किछु लोककेँ तिरंगामे चंद्रमा चाही आ हमरा सबकेँ चंद्रमा पर तिरंगा चाही।
बाबा ईहो घोषणा कयलनि जे भविष्यमे गांधी मैदानमे कथाक आयोजन करताह। संगहि ओ कहलनि जे चुनावक बाद ओ बिहारमे सेहो पदयात्रा निकालताह।
गांधी मैदानमे आयोजित एहि महाकुंभक सुरक्षाक कड़ा व्यवस्था कयल गेल। पूरा आयोजनमे भजन-संध्या, वैदिक मंत्र जप, संत मंडली आ हवन-पूजन जेहन धार्मिक कार्यक्रम भेल। देशभरिसँ हजारों श्रद्धालु पहुंचल आ आयोजनमे भाग लेलनि।
धीरेन्द्र शास्त्रीक वक्तव्यक भक्त समर्थन कयलनि। ओ कहलनि जे देशकेँ हिन्दू राष्ट्र बनबाक चाही आ बिहार एकर शुरुआत करत। भक्त सब कहलनि जे ई कार्यक्रम सनातनक ताकत अछि, एकरा चुनावक सिलसिलामे नहि देखल जाय।
