इंडी गठबंधनक धुरंधर नेता सभ द्वारा प्रधानमंत्री मोदी पर लगातार अशोभनीय आक्रमण जारी अछि, फलतः जनतामे एकर प्रभाव आक्रोशित करयवाला भऽ रहल अछि। राजनीतिक विश्लेषक सभक कहब अछि जे चाहे जाहि कारणसँ, मुदा जे जनता सभ एहि बेर थोड़ेक अनठायल जँका मतदानक प्रति व्यवहार कऽ रहल छल, से सभ उत्तेजित भऽ रहल अछि आ पुनः मोदीक पक्षमे बाकीक चरणमे जबरदस्त हवा बनि सकैत अछि, जे इंडी गठबंधनक लेल घातक सिद्ध होएत, तें इंडी गठबंधनक खासकऽ दिग्गज नेता सभकेँ विशेष रूपसँ प्रधानमंत्री मोदीक विरुद्ध बाजैत काल संयम राखय केर चाही, व्यक्तिगत प्रहारमे निश्चित रुपसँ, आ हद पार करय केर प्रयास नहिं करय केर चाही, अन्यथा बाकीक चरणक लेल ई आत्मघाती सिद्ध भऽ सकैछ। नेशनल कॉन्फ्रेंसक अध्यक्ष आ जम्मू-कश्मीरक पूर्व मुख्यमंत्री फारूक अब्दुल्ला प्रधानमंत्री नरेन्द्र मोदीक परिवारक विषयमे विवादित टिप्पणी कयलनि अछि। ओ कहलखिन जे ओ अपन पत्नीकेँ सम्हारि नहिं सकलाह। जखन हुनका बच्चे नहिं अछि तखन ओ तकरार प्रति मोहब्बत की जनताह ?
एकटा चुनावी रैलीकेँ सम्बोधित करैत फारूक अब्दुल्ला कहलनि जे मुसलमानसभकेँ निशाना बनबैत ओ कहैत छथि जे ई मुसलमान सभ बेसी बच्चा उत्पन्न करैत छथि। मोदी साहब, जँ अहाँ अपन पत्नीक संभारि नहिं सकलौंह तखन अहाँकेँ बच्चा कतयसँ आओत ? अहां की जनैत छी बच्चाक प्रेम आ ओकर लगाव ? बच्चा सभ कोना अपन माता-पिताक सम्मान आ सेवा करैत अछि, अहाँ की जनैत छी, अहाँकेँ कियो नहिं अछि, अहाँ असगर छी आ अहाँ असगरे चलि जाएब। जिनका बच्चा अछि हुनकासँ पूछू। अल्लाहक शुक्र अछि जे अल्लाह हुनका बच्चा देलखिन।
यद्यपि फारूक अब्दुल्ला असगरे नहिं छथि जे जे पीएम मोदीक परिवारक विषयमे विवादास्पद बयान देलनि अछि। एहिसँ पहिने राजद प्रमुख लालू प्रसाद यादव महागठबंधनक एकटा रैलीकेँ सम्बोधित करैत प्रधानमंत्री मोदी पर अभद्र टिप्पणी कयने छलथि। लालू यादव कहने छलाह जे प्रधानमंत्री नरेन्द्र मोदी आइ-काल्हि परिवारवादक उल्लेख कऽ रहल छथि, अहाँकेँ परिवार नहिं अछि आ अहाँ हिन्दू सेहो नहिं छी। प्रधानमंत्री मोदी तेलंगानाक आदिलाबादमे एकटा चुनावी जनसभाकेँ सम्बोधित करैत लालू यादवक एहि बयानक जवाब सेहो देलनि। ओ देशक १४० करोड़ जनसंख्याकेँ अपन परिवार बतौलनि।
एकर अतिरिक्त राजद प्रमुख द्वारा प्रधानमंत्री मोदी पर कयल गेल अभद्र टिप्पणीक विरोध करैत पहिने भाजपा नेता लोकनि आ पुनः अनेको समर्थक सोशल मीडिया पर अपन बायो बदलि अपन नाम पर ‘मोदी का परिवार’ जोड़ि लेलनि।
