राहुल गाँधी आइ प्रेस कॉन्फ्रेंस कऽ मोदी सरकार पर जोरदार हमला कयलनि। ओ नेट आ नीट पेपर लीकसँ जुड़ल आरोपपर सरकारकेँ कठघरामे ठाढ़ कयलनि। राहुल प्रधानमंत्रीपर कटाक्ष करैत कहलनि, जाहि प्रधानमन्त्री लेल कहल जा रहल अछि जे ओ रूस-यूक्रेन युद्धकेँ रोकि सकैत छथि, ओ पेपर लीककेँ रोकि नहिं पाबि रहल छथि।
नेट-जेआरएफ आ नीट पेपर लीकक विवाद दिन-प्रतिदिन गहिंर भऽ रहल अछि। राहुल गांधी आइ एहि मुद्दा पर एकटा प्रेस कॉन्फ्रेंस केर संबोधित कयलनि आ कहलनि, “प्रधानमंत्री नरेन्द्र मोदी पेपर लीक रोकबामे असफल रहल छथि, हम ई मुद्दा संसदमे उठायब।”
राहुल प्रधानमंत्री पर कटाक्ष करैत कहलनि जे, “कहल जा रहल छल जे नरेन्द्र मोदी रूस आ यूक्रेनक बीच युद्ध रोकि देलनि, इजरायल आ गाजाक युद्ध सेहो रोकि देलनि, मुदा ओ भारतमे पेपर लीक रोकबामे सक्षम नहिं छथि।”
वास्तवमे, मेडिकल कॉलेजमे प्रवेशक लेल आयोजित नीट परीक्षामे धांधलीक विषयमे हालक समयमे गम्भीर आरोप लागल अछि।
संगहि, सरकार धांधलीक आशंकाक बाद १८ जूनकेँ आयोजित नेट-जेआरएफ परीक्षा सेहो रद्द कऽ देलक अछि।
दोसर तरफ प्रेस कॉन्फ्रेंसक दौरान राहुल गांधीसँ बिहारक अपन सहयोगी तेजस्वी यादव पर लागल आरोपक बारेमे सेहो सवाल पूछल गेल छल। सवाल ई छल जे बिहारक उप मुख्यमंत्री विजय कुमार सिन्हा गंभीर आरोप लगओलनि अछि जे नीट केर पेपर लीक करबाबयमे तेजस्वी यादवक निकट सहयोगीक हाथ अछि, एहि पर अहाँ की कहब।
एहि पर राहुल गाँधी स्पष्टताक सङ्ग कहलनि जे “जे कियो जिम्मेदार अछि, तकरा पर कारवाई कयल जेबाक चाही।” राहुल एहिसँ पहिने प्रधानमंत्री मोदी आ गृहमंत्री शाह पर स्टाॅक मार्केटमे घोटालाक आरोप सेहो लगओने छलाह।
राहुल गाँधी एहि बेर दूटा लोकसभा सीट जीतैत संसद पहुँचल छथि। मुदा, ओ वायनाडक सीट खाली करबाक निर्णय लेने छथि, आ ओ रायबरेलीसँ सांसद बनल रहताह। एहन स्थितिमे रायबरेलीक प्रतिनिधिक रूपमे राहुल गाँधीकेँ अगिला सप्ताह संसदमे नीट-नेट विवाद उठबैत देखल जा सकैत अछि।
