बरियारपुर थाना क्षेत्रक रामपुर मनी गामक घटना अछि। डीएम मृत्युके पुष्टि कयलनि अछि। डीएम सुब्रत कुमार सेन कहलनि जे अंचल अधिकारीकेँ घटनास्थल पर पठाओल गेल अछि।
मुजफ्फरपुरक बरियारपुर थाना क्षेत्रक रामपुर मनी गाममे बुधदिन (16 अप्रैल) महादलित बस्तीमे भीषण आगि लगलाक कारण चारि बच्चाक मृत्यु भऽ गेल अछि जखनिकि 15 सँ बेसी बच्चा लापता बताओल जा रहल अछि। एहि घटना पर केंद्रीय मंत्री चिराग पासवान दुख व्यक्त कएलनि अछि।
हालाँकि चिराग पासवान अपन एक्स पोस्टमे मृत्युके आँकड़ा पाँच बतौलनि अछि। डीएम चारिक पुष्टि कएलनि अछि।
चिराग पासवान अपन पूर्व निर्धारित कार्यक्रम सबकेँ छोड़बाक निर्णय लेलनि आ अति शीघ्र मुजफ्फरपुर पहुँचि एही दुखद घटना केर जानबाक प्रयास कयलनि। ओ एक्स पर पोस्ट कएलनि, “मुजफ्फरपुर केर बरियारपुर थाना क्षेत्रक रामपुर मनी गामक महादलित बस्तीमे आगि लगबाक कारण 5 टा दर्दनाक मृत्यु भ’ गेल अछि, जाहिमे मासूम बच्चा सेहो शामिल अछि। 15 सँ बेसी बच्चा लापता अछि आ 50 सँ बेसी घर जरि गेल अछि। ई मात्र एकटा हादसा नहि, एकटा जीवित त्रासदी अछि।”
चिराग पासवान अपन पोस्टमे आगू लिखैत छथि, “मुजफ्फरपुर अग्निकांडक लेल मृतकक परिवारक प्रति गहन संवेदना व्यक्त करैत छी। पार्टी कार्यकर्ताकेँ प्रभावित परिवार सभ तक तुरंत राहत पहुँचाबए केर निर्देश देल गेल अछि। हमर पार्टी स्थानीय स्तर पर राहत कार्यकेँ निगरानी करत आ पीड़ितक पुनर्वासमे हर संभव मदद पहुँचाबयमे सहयोग करत। संगहि, बिहार सरकारसँ मृतकक परिवारकें मुआवजा, घायलकें नीक इलाज आ घटनाक उच्चस्तरीय जांचक मांग करैत छी।
मृतक सभमे अंशिका कुमारी (5 वर्ष), ब्यूटी कुमारी (8 वर्ष), सृष्टि कुमारी (6 वर्ष) आ विपुल कुमार (10 वर्ष) शामिल अछि। एहिमे सँ तीनटा बच्चा एकहि परिवारक अछि।
आगि लागबाक कारण सिलेंडर मानल जा रहल अछि। सिलेंडर फटलासँ कतेको घर सभमे आगि लागि गेल। स्थानीय लोकनि स्वयं आगि बुझेबाक प्रयास कयलनि मुदा आगि पर काबू नहि पाओल जा सकल। किछु देर बाद अग्निशमनक गाड़ी सेहो पहुँचल।
जनतब जे जखनि आगि लागल तखनि कतेको बच्चा आ लोक घरमे फँसि गेल। डीएम कहलनि अछि जे घरेलू गैस सिलेंडर फटलासँ आगि लागि गेल। मृतकक परिजनकेँ 4 लाख रुपैयाक मुआवजा देल जायत। समाचार सम्प्रेषण धरि क्षतिक आंकलन कएल जा रहल छल।
