केंद्रीय गृह मंत्री अमित शाह छत्तीसगढ़क बीजापुरमे 50 नक्सलीक हिंसाक रास्ता छोड़ि आत्मसमर्पण करबाक मामिलामे प्रतिक्रिया देलनि अछि। ओ सोशल साइट एक्स पर लिखलनि जे 31 मार्च 2026 केर बाद देशमे नक्सलवाद मात्र इतिहास बनि रहि जायत, ई हमर संकल्प अछि। ओ कहलनि जे ई बहुत हर्षक विषय अछि जे बीजापुर (छत्तीसगढ़) मे 50 नक्सली हिंसाक रास्ता छोड़ि आत्मसमर्पण कयलनि।
ओ कहलनि जे हिंसा आ हथियार छोड़ि विकासक मुख्यधारामे शामिल होएबाक लेल आयबवला लोकक स्वागत करैत छी। पीएम नरेंद्र मोदीक नीति स्पष्ट अछि जे नक्सलवादी हथियार छोड़ि देत आ विकासक रास्ता पर आयत, हुनक पुनर्वास कएल जायत आ मुख्यधारा संग जोड़ल जायत।
केंद्रीय गृह मंत्री बाकी नक्सलीसँ अपील कएलनि जे ओ हथियार छोड़ि कऽ मुख्यधारामे आबि जाय। 31 मार्च 2026 केर बाद देशमे नक्सलवाद केवल इतिहास बनि जायत, ई हमरा सभक संकल्प अछि।
जनतब देब जे रविकेँ प्रधानमंत्री नरेंद्र मोदी छत्तीसगढ़क बिलासपुरक भ्रमण कयलनि। एहि दौरान 33,700 करोड़ टका केर विकासमूलक परियोजनाक उद्घाटन आ शिलान्यास कयलनि। प्रधानमंत्रीक भ्रमणसँ पूर्व 50 नक्सलवादी अपन विद्रोही गतिविधिकेँ त्याग देलक आ समाजमे फेरसँ शामिल होएबाक निर्णय कयलक। ई केन्द्र आ राज्य सरकार द्वारा चलि रहल नक्सल विरोधी अभियान आ घर वापस आऊ अभियानक एकटा महत्वपूर्ण जीत मानल जाइत अछि। ई अभियान क्षेत्रमे माओवादक विरूद्ध चलि रहल अभियानमे एक महत्वपूर्ण अध्याय जोड़ैत अछि, केंद्रीय गृहमंत्री अमित शाह घोषणा कएने छैथ जे आगूक वर्ष धरि देश नक्सल मुक्त भ’ जाएत।
एही नक्सली सभ पर सामूहिक रूपसँ 68 लाख रूपैयाक इनाम छल। एहि सभमे सँ कतेको नक्सलवादी कथित तौर पर सड़क पर तोड़फोड़, पोस्टर आ बैनरक माध्यमसँ नक्सली प्रचार-प्रसार आ बीजापुर संग आसपासक इलाकाक सूचना प्राप्त करय केर गतिविधिमे संलग्न छल। हालमे ई आत्मसमर्पण 29 मार्चक एहि तरहक घटनाक बाद भेल अछि, जखन दंतेवाड़ा जिलामे 15 माओवादी मुख्यधारामे शामिल होबाक संकल्प लेलक।
जिला पुलिस बल आ सीआरपीएफ द्वारा गाममे व्यापक रूपसँ प्रचारित ई अभियान कट्टर माओवादी नेता सभ सहित कतेको माओवादीकेँ हथियार डालबाक आ शांतिपूर्ण जीवन जीबाक लेल सफलतापूर्वक प्रेरित कएलक अछि।
