पश्चिम चंपारणमे शिक्षा विभाग द्वारा जारी स्वैच्छिक स्थानांतरण आदेशमे गंभीर गड़बड़ी सामने आयल अछि। विभाग बहुत रास सरकारी शिक्षकक एहेन स्कूलमे स्थानांतरित कs देलक अछि जे निजी प्रबंधनमे संचालित अछि। एहिसँ संबंधित शिक्षककेँ नहिं मात्र भ्रमित कयल गेल अछि, बल्कि विभागक कामकाज पर गंभीर सवाल सेहो उठल अछि।
घटना चनपटिया अंचल क्षेत्रक अछि, जतय दू टा शिक्षिका पूजा कुमारी आ फर्नाज खातून केर चूड़ी बाजार स्थित लोयोला मिडिल स्कूल (निजी शैक्षणिक संस्थान) मे स्थानांतरित कऽ देल गेल। जखनि दुनू शिक्षिका योगदान देबय लेल विद्यालय पहुंचलीह तs हुनका पता चललनि जे ई स्कूल सरकारी स्कूल नहिं, बल्कि निजी संस्था द्वारा संचालित अछि।
एहि गलतीक जानकारी भेटलाक बाद विभागीय अधिकारी हरकतमे आबि गेलाह। स्थापनाक डीपीओ कुमार अनुभव स्वीकार कयलनि जे स्थानांतरण सूचीमे मौजूद तकनीकी विसंगतिक कारण ई गलती भेल अछि। ओ कहला जे एहि मामिलामे उच्च शिक्षा पदाधिकारीसँ मार्गदर्शन मांगल गेल अछि आ जल्दिये संशोधित आदेश जारी कयल जाएत।
दोसर दिसि एहि क्षेत्रक भरपटिया उच्च माध्यमिक विद्यालयमे स्थानांतरण पर सेहो सवाल उठल अछि। पहिनेसँ एहि ठाम 1 स 12 तक केर कक्षा लेल 32टा शिक्षक शिक्षिका काज कs रहल छथि, हालक स्थानांतरणक आदेशक तहत एहि ठाम 11टा आओर शिक्षककेँ तैनात कयल गेल अछि, जाहिमे सँ तीनटा शिक्षक पहिनेसँ योगदान दs चुकल छथि। मुदा स्कूलक हेडमास्टर प्रभु राम छात्रक संख्याक अनुपातमे एकरा जायज ठहरौलनि अछि। ओ कहला जे एखन विद्यालयमे 1150 छात्रक नामांकन अछि आ बेसी शिक्षक केर तैनातीसँ शिक्षाक गुणवत्तामे सुधार होएत। ई समस्त घटना शिक्षक समुदायमे असंतोषक कारण बनल अछि ।
एखनि धरि सरकारी स्कूलमे सेवा देबय वाला बहुतो शिक्षक निजी स्कूलमे ट्रांसफरक आदेश मिललाक बाद अपन असमर्थता व्यक्त कs रहल छथि। हुनकर कहब छैन कि शिक्षा विभाग द्वारा बिना बुनियादी जांचक जारी आदेशसँ हुनका मानसिक तनावमे डालल जा रहल अछि। आब देखय पड़त जे शिक्षा विभाग एहि गलती केर कतेक जल्दी आ प्रभावी ढंगसँ सुधारैत अछि। फिलहाल ई तय अछि जे विभागक विश्वसनीयता पर सवाल उठत।
