बाबा रामदेव उत्तर प्रदेश आ उत्तराखंडमे कांवड़ यात्रा मार्ग पर आबयवला दोकान आ रेस्तराँ मालिकक लेल नेम प्लेट लगयबाक आदेशक सराहना कयलनि अछि। रविदिन ओ कहलनि जे “जखनि रामदेवकेँ अपन पहिचानक खुलासा करबामे कोनो समस्या नहिं अछि, तखन रहमानकेँ समस्या किएक हेबाक चाही ?”
ओ कहलनि “नाम नुकाबए केर जरूरत नहिं अछि। अहाँकेँ अपन काज शुद्धता आ प्रामाणिकताक संग करबाक चाही। जँ हमर काजमै पवित्रता आ शुद्धता अछि, तखन हम चाहे कोनो धर्म वा जातिक होइ, एतय सभ भारतीय अछि, तेँ सभकेँ भारतीय होयबाक गर्व होयबाक चाही। बाबा रामदेव कहलनि जे सबकेँ अपन पहिचान पर गर्व करबाक चाही आ एकरा बारेमे जे नैरेटिव बनाओल जा रहल अछि ओ उचित नहिं अछि।
आदेश पर विपक्षी नेताक विरोध पर ओ कहलनि, “एकर पाछाँ एकटा राजनीतिक उद्देश्य अछि। लोक प्रधानमंत्री नरेन्द्र मोदीक खिलाफ सेहो प्रदर्शन कऽ रहल छथि। लोक कहि रहल छथि जे प्रधानमंत्री संविधान, दलित, ओबीसी आ मुसलमानक लेल खतरा छथि। पूरा देशमे हुनक विरुद्ध नफरत आ घृणा पसारल जा रहल अछि। किछु लोक हुनका मारबाक लेल उतारु भऽ रहल अछि, ठीक ओहिना जेना अमेरिकाक पूर्व राष्ट्रपति डोनाल्ड ट्रम्प पर हमला कयल गेल छल आ एकटा गोली हुनक कानकेँ छूबैत निकलल छल। खैर, आब हुनकर (ट्रम्प के) जीत निश्चित अछि।”
दिल्लीमे श्री केदारनाथ मन्दिरक प्रतिकृति बनयबाक सम्बन्धमे बाबा रामदेव कहलनि जे हमर प्रमुख तीर्थस्थल आ मन्दिरक कोनो विकल्प नहिं भऽ सकैत अछि। ओ कहलनि जे भगवान द्वारा बनाओल गेल धामकेँ कोनो मनुष्य नहिं बना सकैत अछि। बाबा रामदेव चारि धामक नामक दुरुपयोग करयवलाकेँ धामी सरकार द्वारा देल गेल चेतावनीक स्वागत कयलनि।
