देश भरिमे तमाम विरोध-प्रदर्शनक बीच वक्फ बोर्ड संशोधन बिल आई लोकसभामे दोपहर 12 बजे विधेयक पेश कएल जायत। विपक्ष बिल पर 12 घंटा चर्चा करबाक माँग कएलक अछि, जखनिकि सरकार 8 घंटाक समय देलक अछि। एहि बीच भाजपा अपन सभ सांसदकेँ व्हिप सेहो जारी करत। पार्टीक सभ सांसदकेँ सदनमे उपस्थित रहब अनिवार्य होयत।
संसदीय कार्य आ अल्पसंख्यक कल्याण मंत्री किरेन रिजिजू 8 अगस्त 2024 केँ ई बिल लोकसभामे पेश कएलनि, जे ओतहि विपक्षक हंगामाक बाद संयुक्त संसदीय समिति (जेपीसी) क’ पठा देल गेल। संसदीय समितिमे कुल 44 संशोधन पेश कएल गेल जाहिमे करीब 14 संशोधन जगदंबिका पाल’क अगुवाई वाला जेपीसी द्वारा स्वीकृत कएल गेल। संशोधित बिलकेँ कैबिनेट पहिनेसँ मंजूरी देने अछि। सरकारक लेल एकरा पारित करब चुनौतीपूर्ण होयत। हालाँकि, आंकड़ाक लिहाजसँ विधेयककेँ संसदसँ पारित करबाक लेल एनडीए दल सभक पर्याप्त बहुमत अछि, मुदा आब देखनाय ई अछि जे एनडीए केर सम्पूर्ण सहयोगी दल एही बिलक समर्थन करैत छथि कि नहि ?
वक्फ बोर्ड संशोधन विधेयक पर सत्तापक्ष आ विपक्षमे तनातनीक बीच जेडीयूक कार्यकारी अध्यक्ष संजय झा आ केंद्रीय मंत्री राजीव रंजन उर्फ ललन सिंह काल्हि गृह मंत्री अमित शाहसँ भेंट कएलनि। मानल जा रहल अछि जे एहि दौरान जेडीयूक दुनू नेता अमित शाहक सामने पार्टी केर स्टैंड साफ कएलनि।
एनडीए केर सहयोगी पार्टी जेडीयू द्वारा सरकारकेँ तीन सुझाव देल गेल अछि। पार्टी सूत्रक कहब अछि जे सरकारसँ हुनका सभकेँ आश्वासन भेटल अछि जे जखनि ई बिल चर्चा हेतु लोकसभामे आयत तँ हुनकर एही सुझाव सभकेँ शामिल कएल जाएत। जेडीयू सरकारकेँ कहलक जे जमीन राज्यक मामिला अछि आ नव कानूनमे एकर प्राथमिकता बनल रहय। जेडीयू केर दोसर सुझाव अछि जे नव कानून पूर्वप्रभावी लागू नहि होयत, बशर्ते जे वक्फ संपत्ति पंजीकृत भ’ जाए। मतलब जे वक्फ संपत्तिसभ रजिस्टर्ड अछि, ताहि पर नव कानूनक असर नहि पड़त, मुदा जे विवादित वा सरकारी संपत्ति अछि, जे रजिस्टर्ड नहि अछि, तकर भविष्यक फैसला वक्फ बिलमे तय मानकक अनुसार होयत। संगहि जँ कुनू वक्फ संपत्ति सरकारी जमीन पर अछि तँ तकर फैसला सेहो बिलक अनुसार होयत। नीतीशक पार्टी केर तेसर सुझाव अछि जे जँ कुनू वक्फ संपत्ति पंजीकृत नहि अछि, मुदा तमाम धार्मिक भवन जेना मस्जिद, दरगाह आदि बनल अछि तँ ओहिकेँ नहि तोड़ल जाए। ओकर स्टेटस बरकरार राखल जाय।
एनडीएमे दोसर सबसँ बड़का सहयोगी टीडीपी संसदमे वक्फ संशोधन विधेयक केर समर्थन करबाक ऐलान कएलक अछि। टीडीपीक लोकसभामे 16 सांसद छथि। पहिने ई संभावना जताओल जा रहल छल जे टीडीपी वक्फ बिल पर न्यूट्रल रहि कए दूरी बनौने रहि सकैत अछि। मुदा पार्टीक राष्ट्रीय प्रवक्ता प्रेम कुमार जैन काल्हि कहला जे टीडीपी सदिखन मुसलमानक हितक ख्याल कएलक अछि आ सीएम नायडू पहिनेसँ कहि चुकल छथि जे हम मुसलमानक सभ हितक रक्षा करब। आब टीडीपीक ऐलानक बाद बिलकेँ पास होयबाक अपेक्षा बढ़ि गेल अछि। बिलक बारेमे बाजैत प्रेम कुमार जैन कहलनि,’पूरा मुस्लिम समुदाय वक्फ संशोधन विधेयक केर पेश होयबाक इंतजार करैत अछि। हमर पार्टी एकर समर्थन करत। चंद्रबाबू नायडू पहिनेसँ कहि चुकल छथि जे हम मुस्लिम समुदायक हितक लेल काज करब।
काल्हि बिल पेश कएल जायत, तकरा बादे हम एहि पर कोनो टिप्पणी करब। हम अहाँकेँ भरोसा दैत छी जे चंद्रबाबू नायडू मुसलमानक पक्षमे छथि।
