फर्जी वोट दैत पकड़ायल आरोपीकेँ, सैकड़ों लोकक भीड़ थाना पर हमला कए लेलक छोड़ाय
दरभंगा
*
आरोपी सभ मिथिला क्षेत्रीय बिहारक दरभंगाक एकटा मतदान केंद्र पर फर्जी वोट देबाक क्रममे पकड़ल गेल छल। मुदा, सैकड़ो लोकक भीड़ थाना पर हमला कऽ आरोपीकेँ छोड़ा कऽ लऽ गेल। आरोपी सभकेँ फेरसँ पकड़बा लेल एकटा विशेष जांच दल (एसआईटी) केर गठन कयल गेल अछि।
लोकसभा चुनाव २०२४ केर अन्तर्गत देशक विभिन्न राज्यमे पाँचम चरणक लेल २० मईकेँ मतदान भेल छल। एहि अवधिमे मिथिला क्षेत्रीय बिहारक दरभंगाक एकटा मतदान केन्द्रपर फर्जी वोट देबाक आरोपमे चारि गोटेकेँ गिरफ्तार कयल गेल छल। मुदा सैकड़ो लोकक भीड़ थाना पर पाथरसँ हमला कयलक आ आरोपी सभकेँ पुलिसक पकड़सँ छीन लेलक।
वास्तवमे दरभंगा जिलाक जाले थाना क्षेत्रक मतदान केंद्र नंबर ८५ (देवरा बंधौली) पर फर्जी वोट देबय केर आरोपमे पुलिस दू गोटे तारिक अनवर आ नूर नबीकेँ गिरफ्तार कयलक। मुदा, हुनका सभकेँ गिरफ्तार कयलाक किछुए समय बाद १०० सँ बेसी लोकक भीड़ हिरासतमे लेल गेल सन्दिग्धसभकेँ जबरदस्ती मुक्त करा लेलक आ सुरक्षाकर्मी सभपर सेहो हमला कयलक।
जिलाक जाले थाना पर उपद्रवी लोकनि हमला कऽ हिरासतमे लेल गेल आरोपीकेँ मुक्त कराबय केर तीन दिन बाद दरभंगा पुलिस थाना प्रभारीकेँ खिलाफ कारवाई कयलक अछि। थाना प्रभारीकेँ कर्तव्यमे लापरवाहीक आरोपमे निलंबित कऽ देल गेल अछि। हुनक विरुद्ध विभागीय कारवाई शुरू कयल जायत किएक तँ ओ घटनाक जाँच करबामे विफल रहलाह आ अपन वरिष्ठकेँ समय पर सूचित करबामे विफल रहलाह।
एकटा पुलिस अधिकारी जनतब देलनि अछि जे आरोपीकेँ फेरसँ पकड़बाक लेल एकटा विशेष जाँच दल (एसआईटी)क गठन कयल गेल अछि। दरभंगा जिलाक जाले क्षेत्र मधुबनी लोकसभा क्षेत्रक अन्तर्गत अबैत अछि, जतय २० मईकेँ मतदान भेल छल। जनतब जे सब सीट पर चुनावक परिणाम 4 जूनकेँ आओत।
