बिहारक बाहुबली नेता आ मोकामाक पुर्व विधायक अनंत सिंह पुर्व मुख्यमंत्री तेजस्वी यादवक नीतीश कुमार सरकार पर भ्रष्टाचारक बढ़ावा देबयवाला बयान पर पलटवार कयलनि अछि। अनंत सिंह कहलनि जे तेजस्वी यादवक पिता घोटालामे जेल गेल छथि, तेजस्वी घोटाला कयने अछि। बिहारक लोक नीक जकाँ जनैत छथि जे “केकर पिता कतेक दिन जेलमे रहि कऽ आयल छथि।”
पटनाक दीवानी अदालतमे एकटा मामिलाक सुनवाई लेल पहुँचल अनन्त सिंह संवाददाता लोकनिक सङ्ग चर्चाक क्रममे कहलनि जे हुनक पिता भ्रष्टाचारक आरोपमे जेल गेल छथि, आन कियो नहिं।
हालहिमे जेलसँ बाहर निकलल अनंत सिंह कहलनि जे आब ओ सक्रिय राजनीतिमे रहताह। ओ विधानसभा चुनाव लड़बाक बात सेहो कहलनि। सिंह कहलनि जे जाधरि नीतीश कुमार जीवित छथि, ओ बिहारक मुख्यमंत्री रहताह आओर केकरो किछु नहिं चलत।
विपक्षक नेता तेजस्वी यादवक बिहारमे बढ़ैत अपराधक घटना पर देल गेल बयान पर पूर्व विधायक कहलनि, “हमरा ओहि लोक सभपर किछु कहय केर नहिं अछि। अनावश्यक लोक बकवास गप्प करैत अछि, हम ई सभ नहिं सुनय चाहैत छी, जकरा सुनय केर अछि से सुनय।”
ओ इहो दावा कयलनि जे अगिला विधानसभा चुनावमे राजदकेँ मात्र सातसँ आठ सीट भेटत।
पूर्व विधायक आ बाहुबली नेता अनंत सिंह हालहिमे बिहारक मुख्यमंत्री नीतीश कुमारक आवास पहुँचलाह। एहि बैसारक बादहि ई अनुमान लगाओल जा रहल छल जे ओ २०२५ केर चुनावक तैयारी लेल मुख्यमंत्रीसँ भेंट करबाक लेल आयल छलाह। बाहुबली नेता १६ अगस्तकेँ जेलसँ रिहा भेल छथि।
