केन्द्रीय गृह मंत्रालय जम्मू-कश्मीरक रियासी जिलामे तीर्थयात्रीसभकेँ लऽ जा रहल एकटा बसपर भेल आतंकी हमलाक जाँच राष्ट्रीय जांच एजेंसी (एनआईए)केँ सौंपि देलक अछि। बतबैत चली जे ९ जूनक साँझ तीर्थयात्रीकेँ लऽ जा रहल बस पर आतंकी हमला भेल छल। रियासीमे आतंकी हमलाक बाद तीर्थयात्रीसभकेँ लऽ जा रहल बस एकटा खाईमे खसि पड़ल।
अधिकारी लोकनि कहलनि जे रविदिन केन्द्रीय गृह मंत्री अमित शाहक अध्यक्षतामे भेल एकटा उच्चस्तरीय बैसारमे ई निर्णय लेल गेल, जाहिमे ओ सेना, अर्धसैनिक बल आ खुफिया एजेंसीसभकेँ जम्मू क्षेत्रमे सेहो उग्रवादक विरुद्ध कश्मीर घाटीमे प्राप्त सफलताकेँ दोहरयबाक निर्देश देलनि।
राष्ट्रीय जांच एजेंसी १५ जूनकेँ जम्मू-कश्मीर पुलिससँ रियासी आतंकी हमलाक मामिलाकेँ अपन हाथमे लऽ लेलक आ गृह मंत्रालयक आदेशक बाद एकटा नव प्राथमिकी दर्ज कयलक।
अधिकारी लोकनि कहलनि जे एनआईए एहि हमलाक पाछाँ एकटा पैघ षड्यंत्रक जाँच करत, जकर संबंध पछिला मंगल आ बुधदिन कठुआ आ डोडामे भेल तीनटा अन्य हमलासँ सेहो भऽ सकैत अछि। कहल जा रहल अछि जे जम्मू-कश्मीर पुलिस पछिला एक सप्ताहमे कतेको लोकसँ पूछताछ कयलक अछि, जाहिमे आतंकवादीक समर्थन करयवला लोकसभ सेहो शामिल अछि।
गृह मंत्री रविदिन स्थानीय खुफिया नेटवर्ककेँ मजबूत करबाक, आतंकवादी द्वारा उपयोग कयल जायवला सुरंगक पता लगयबाक आ ड्रोन घुसपैठसँ निपटबाक लेल आधुनिक तकनीकक उपयोगक महत्वपर सेहो जोर देलनि आ रेखांकित कयलनि जे सुरक्षा बल आ खुफिया एजेंसीसभकेँ “मिशन मोड” पर काज करबाक आ समन्वयकेँ सुव्यवस्थित करबाक आवश्यकता अछि।
९ जूनकेँ आतंकवादी शिव खोड़ी मन्दिरसँ कटरामे माता वैष्णो देवी मन्दिर जा रहल ५३ सीटर बसपर गोलीबारी कयलक, जाहिसँ बस अनियंत्रित भऽ सड़कसँ उतरि पोनी क्षेत्रक तेरयाथ गाम लग एकटा गहींर खाईधमे खसि पड़ल। बस उत्तर प्रदेश, राजस्थान आ दिल्लीक तीर्थयात्रीसभकेँ लऽ जा रहल छल। एहि घटनामे १० लोकक मृत्यु भऽ गेल आ ४२ गोटे घायल भऽ गेलाह। अधिकारी लोकनि कहलनि जे पछिला सप्ताह जम्मू-कश्मीर पुलिस आतंकी हमलाक जाञ्चक संबंधमे कुल ५० संदिग्धकेँ हिरासतमे लेने छल। पुलिस प्रवक्ता कहलनि जे पुलिस आ सुरक्षा बल द्वारा व्यापक जाञ्चक बाद ई कार्रवाई कयल गेल जाहिसँ महत्वपूर्ण सुराग भेटल जाहिसँ हमलाक अपराधीसभक पहिचान आ पकड़बामे सहायता भेटत।
