बोर्नविटा सन बहुत रास स्वास्थ्य पेय, जे बच्चासभक वृद्धि बढ़यबाक दावा करैत अछि, बाजार आ ई-कॉमर्स वेबसाइट पर उपलब्ध अछि। लेकिन, की अहां जनैत छी जे एहन स्वास्थ्य पेय वास्तवमे अहाँक बच्चाक लेल सेहतमंद अछि वा नहि ? आब भारत सरकार हेल्थ ड्रिंकक नाम पर बेवरेज बेचय लेल ई-कॉमर्स कम्पनीक खिलाफ सख्त कारवाई कयलक अछि।
दरअसल, आब बाजारमे बोर्नविटा सन सभ ड्रिंक्स ई-कॉमर्स साइट पर हेल्थ ड्रिंकक नाम पर नहिं बेचल जा सकैत अछि। हेल्थ ड्रिंक्स पर उद्योग मंत्रालय सभ ई-कॉमर्स कंपनीकेँ एडवाइजरी जारी कयलक अछि। एहिमे कहल गेल अछि जे बोर्नविटा आ अन्य पेय पदार्थकेँ हेल्थ ड्रिंक्स श्रेणीमे नहिं राखल जाय।
वाणिज्य आ उद्योग मंत्रालय सभ ई-कॉमर्स कम्पनीसभकेँ वेबसाइटसँ ‘स्वास्थ्य पेय श्रेणी’सँ बोर्नविटा सहित पेय पदार्थकेँ हटाबय लेल कहलक अछि। “विभागक संज्ञानमे आयल अछि जे बोर्नविटा सहित किछु पेय पदार्थ पर ई-कॉमर्स साइट आ प्लेटफॉर्म पर ‘हेल्थ ड्रिंकक’ रूपमे वर्गीकृत कयल गेल अछि।
राष्ट्रीय बाल अधिकार संरक्षण आयोग (एनसीपीसीआर) पओलक अछि जे खाद्य सुरक्षा आ मानक अधिनियमक अन्तर्गत ‘स्वास्थ्य पेय’क कोनो परिभाषा नहि अछि। एकरा ध्यानमे राखैत ई-कॉमर्स कंपनी आ वेबसाइटकेँ सलाह देल जाय कि ओ अपन प्लेटफॉर्मसँ ‘हेल्थ ड्रिंक’क श्रेणीसँ बोर्नविटा सहित पेय पदार्थकेँ हटा देथि ।
जनतब जे एनसीपीसीआर एकटा पत्र लिखने छल आ बोर्नविटा सन सभ हेल्थ ड्रिंक्स आ पेय पदार्थकेँ बच्चासभक स्वास्थ्यक लेल हानिकारक बतओने छल। राष्ट्रीय बाल अधिकार संरक्षण आयोगक जाँच रिपोर्टक बाद उद्योग आ आन्तरिक व्यापार संवर्धन विभाग (डीपीआईआईटी) एकटा पत्र लिखि परामर्श जारी कयलक अछि।
