दू विचारधाराक बीच अछि लड़ाई : राहुल गांधी

मुम्बई
*

कांग्रेस नेता राहुल गांधी रविदिन भाजपा पर कटाक्ष करैत कहलनि जे लड़ाई दू विचारधाराक बीच अछि। एकटा विचारधारा मूल रूपसँ सत्ताक केन्द्रीकरणमे विश्वास करैत अछि आ दोसर विचारधारा सभकेँ ‘शिवक बारात’ जकाँ एक सङ्ग लऽ कऽ चलैत अछि।

कांग्रेसक पूर्व अध्यक्ष रविदिन गैर सरकारी संगठन आ नागरिक समाजक प्रतिनिधिसभक सङ्ग बातचीतक क्रममे अपन बहिन प्रियंका गाँधी वाड्रा आ महात्मा गाँधीक प्रपौत्र तुषार गाँधीक सङ्ग बजैत छलाह। ओ ओहि पाँच गारंटी (न्याय) पर चर्चा कयलनि जकर घोषणा ओ शनिदिन चैत्यभूमिमे सम्पन्न भारत जोड़ो न्याय यात्राक दौरान कयलनि।

राहुल गाँधी आ प्रियंका गाँधीक सङ्ग मुम्बई आ महाराष्ट्रक कांग्रेस नेतासभ अगस्त क्रांति मैदानसँ दक्षिण मुम्बईक मणि भवन धरि पदयात्रा कयलनि।

कांग्रेस नेता कहलखिन, “भारत जोड़ो न्याय यात्राक ताकत मात्र हम नहिं छलहुँ, बल्कि हमरा संग चलयवला करोड़ों भारतीय छलाह। ई लड़ाई राहुल गाँधी आ नरेन्द्र मोदी वा कांग्रेस आ भाजपा धरि सीमित नहिं अछि। लड़ाई दूटा विचारक बीच अछि। एकटा कहैत अछि जे देश ऊपरसँ चलत आ सभ आदेशक पालन करत। दोसर कहैत अछि, देशकेँ विकेन्द्रीकृत तरीकासँ चलाउ। हम एकरा ‘शिवक बारात’ कहि सकैत छी।

ओ लोकसभसँ आह्वान कयलनि जे ओ डरथि नहिं, विशेष रूपसँ तखन जखन लड़ाई दू टा विचारधाराक बीच होय। किछु लोक कहैत छथि जे भाजपा संविधान आ सब किछु बदलि देत। हम बता दैत छी, हुनकामे संविधान बदलबाक हिम्मत नहिं अछि। एहि लड़ाईमे सत्य आ हिन्दुस्तान हमरासभक संग ठाढ़ अछि।

ओ कहलखिन, गरीब, दलित, महिलाक खिलाफ अन्याय देशमे बढ़ैत नफरत केर मूल कारण अछि कियैकि मुश्किलसँ दू सँ तीन प्रतिशत लोककेँ न्याय भेटैत अछि जिनका लेल सरकार आ सब संस्थान काज करैत अछि। ओ कहलनि, जखन हम सरकारमे छलहुं आ कृषि ऋण माफीक मुद्दा उठौलहुँ तखन हमरासभकेँ कहल गेल जे किसान आलसी भऽ जाएत। जखन हम मनरेगा अनलहुं तखन हमरासभकेँ कहल गेल जे गरीब बर्बाद भऽ जायत। दोसर दिस जखन २०-२५ लोकक १६ लाख करोड़ टकाक बैंक ऋण माफ कएल जाइत अछि तखन की ई ओकरा बर्बाद नहिं करैत अछि ?

कांग्रेस नेता कहलनि, “ई बुझबाक चाही जे अन्याय मात्र हमरा संग नहि अपितु हमर भाय पर सेहो भऽ रहल अछि। ओ कहलनि जे आन्दोलन तखन शुरू होइत अछि जखन सभ कियो एक दोसरक हितक रक्षा करय लगैत अछि।