केन्द्रीय गृह मंत्री अमित शाह उत्तराखंडक चमोलीमे माणा गाम लग हिमस्खलन पर गहन नजरि राखि रहल छथि। ओ एहि संबंध मे मुख्यमंत्री पुष्कर सिंह धामी, डीजी आईटीबीपी आ डीजी एनडीआरएफसँ फोन पर बात कयलथि। एकर संगहि अमित शाह कहलनि जे दुर्घटनामे फँसल लोकसभकेँ निकालब हमर प्राथमिकता अछि।
केंद्रीय गृह मंत्री अमित शाह सोशल मीडिया प्लेटफॉर्म एक्स पर लिखलनि, “उत्तराखंडक चमोलीमे ग्लेशियर फटबाक संबंधमे मुख्यमंत्री पुष्कर सिंह धामी, डीजी आईटीबीपी आ डीजी एनडीआरएफसँ बात कयलहुँ। दुर्घटनामे फँसल लोकके निकालनाइ हमर प्राथमिकता अछि। स्थानीय प्रशासन पूरा तत्परताक संग बचाव कार्यमे लागल अछि। एनडीआरएफक दूटा टीम सेहो जल्दिये घटनास्थल पर पहुँचि रहल अछि।”
एकर अतिरिक्त, रक्षा मंत्री राजनाथ सिंह चमोली घटनाक संबंधमे उत्तराखण्डक मुख्यमंत्री धामीसँ फोनपर बात कयलनि। ओ एकटा पोस्टमे लिखलनि, ‘आइ जोशीमठ (उत्तराखंड)क माणा क्षेत्रमे एकटा दुखद हिमस्खलन भेल, जाहिसँ बीआरओ केर जीआरईएफ कैंप प्रभावित भेल। हम मुख्यमंत्री पुष्कर सिंह धामी’सँ स्थितिक बारेमे बात कयलहुं। प्रशासन प्रभावित लोकसभकेँ हरसंभव सहायता प्रदान कऽ रहल अछि। स्थानीय सेनाक इकाइसभ द्वारा बचाव अभियान सेहो चलि रहल अछि। सभ उपलब्ध संसाधनक उपयोग करैत फँसल कर्मी सभकेँ बचाबय लेल हरसंभव प्रयास कयल जा रहल अछि।
मुख्यमंत्री पुष्कर सिंह धामी राज्य आपदा नियंत्रण कक्षमे राज्यक शीर्ष अधिकारीसभक संग बैसार कयलनि। एहि दौरान ओ चमोलीमे माणा लग हिमस्खलनसँ प्रभावित मजदूरसभकेँ बचाबय लेल चलि रहल अभियानक प्रगतिक समीक्षा कयलनि। माणा गामक लग एकटा सड़कपर काज करैवला सीमा सड़क संगठन (बीआरओ)क सत्तावन मजदूर बर्फमे दबि गेलाह। एखनि धरि १६ श्रमिककेँ सुरक्षित बचा लेल गेल अछि।
जनतबक अनुसार ई सभ मजदूर भारत-चीन सीमा लग स्थित चमोलीक माणा गामक लग बीआरओक निर्माण कार्यमे लागल छलाह। एहि अवधिमे अचानक एकटा ग्लेशियर टूटि गेल आ ओतय उपस्थित ५७ श्रमिक एकर चपेटमे फँसि गेलाह। खबरि अछि जे दुर्घटनाक सूचना भेटलाक बाद एसडीआरएफ, एनडीआरएफ, जिला प्रशासन, आईटीबीपी आ बीआरओक टीम घटनास्थल पर पहुँचल। एम्हर बर्फमे फँसल मजदूरसभकेँ बचाबय लेल बचाव अभियान चलि रहल अछि।
