एहि साल अप्रैलमे बाइक सवार लोकसभ फिल्म स्टार सलमान खानक घरक बाहर गोली चलेने छल। एहि घटनाक बादसँ हुनका कतेको जानसँ मारय केर धमकी भेटि चुकल अछि।
ओना सलमानक सुरक्षा बढ़ा देल गेल अछि। हुनकर निवास पर पुलिस भारी सुरक्षा करैत अछि। सलमानक व्यक्तिगत सुरक्षा गार्डक अतिरिक्त पुलिसकर्मी तैनात अछि।हालहिमे सलमानक निकट रहल बाबा सिद्दीकीक मृत्युक बाद सलमान खानक सुरक्षा आओर बढ़ा देल गेल अछि।
जनतब जे अप्रैलमे सलमानक घर पर भेल गोलीबारीक मामिलामे मुम्बई पुलिस जाँच तेज कऽ देलक अछि। मुम्बई पुलिसक अपराध शाखा जेलमे बंद गैंगस्टर लॉरेंस बिश्नोईक भाय अनमोल बिश्नोईकेँ अमेरिकासँ वापिस अनबाक लेल प्रत्यर्पण कार्यवाही शुरू कऽ देलक अछि। २५ अक्टूबरकेँ राष्ट्रीय अन्वेषण अभिकरण (एनआईए) गैंगस्टर लॉरेंस बिश्नोईक भाय अनमोल बिश्नोईक सूचना देबयवला १० लाख टाकाक इनामक घोषणा कयने छल। अनमोल बिश्नोई पर सलमान खानक घर पर फायरिंग, बाबा सिद्दीकी आ पंजाबी सिंगर सिद्धू मूसेवालाक हत्याक आरोप अछि।
अपराध शाखाक अधिकारी कहलनि जे वारंटक अतिरिक्त पुलिसकेँ प्रत्यर्पण प्रक्रियाकेँ औपचारिक रूप देबाक लेल अदालतक दस्तावेजक प्रमाणित प्रतिक सेहो आवश्यकता होइत अछि। विशेष मकोका अदालत १६ अक्टूबरकेँ ओकर अपराध शाखाक आवेदनकेँ मंजूरी देलक आ पुलिसकेँ आशा अछि जे जल्दिये दस्तावेज भेटत।
आगूक कारवाईक लेल मुम्बई अपराध शाखा अनमोल बिश्नोईकेँ प्रत्यर्पण लेल केन्द्र सरकारकेँ आवेदन पठौलक अछि।
