प्रियंकाकेँ चुनावमे नहि उतारय केर फैसला गांधी परिवारक : खड़गे

नई दिल्ली
*

कांग्रेस नेता प्रियंका गाँधी द्वारा रायबरेलीसँ चुनाव लड़बाक चर्चा एहि बेर बहुत जोरगर छल। मानल जाइत छल जे प्रियंका गाँधी एहि बेर अपन राजनीतिक जीवनमे पहिल चुनाव लड़ि सकैत छथि। मुदा, एहि बेर सेहो ई सभ अटकलबाजी गलत साबित भेल आ राहुल गाँधी रायबरेलीसँ अपन नामांकन दाखिल कयलनि। ओतहि प्रियंकाकेँ अमेठी लोकसभा सीटसँ सेहो मौका नहिं भेटल आ ओतय कांग्रेस किशोरी लाल शर्मा केर रूपमे एकटा पुरान वफादारकेँ मौका देलक। दुनू सीट पर वोटिंग भऽ चुकल अछि, मुदा एखन धरि लोकक मनमे सवाल इ अछि जे प्रियंकाकेँ चुनावमे उतारबाक निर्णय केकर नहिं छल। कांग्रेस अध्यक्ष मल्लिकार्जुन खड़गे एकर जवाब देलनि। खड़गे कहलनि जे ई निर्णय सोनिया गाँधी, राहुल आ स्वयं प्रियंका लेलनि। ओ कहलनि जे सोनिया गाँधी पिछला ३० सालसँ राजनीतिमे छथि आ ओ नीक जकाँ जनैत छथि जे केकरा कतयसँ चुनाव लड़बाक चाही। प्रियंका गांधी सेहो हमर स्टार प्रचारक छथि। राहुल गाँधीक सङ्ग ओ सेहो प्रचार कऽ रहल छथि। सोनिया जीक स्वास्थ्य ठीक नहिं अछि। एहन स्थितिमे प्रियंकाक डिमांड अछि आ हजारो लोक हुनका सुनबा लेल पहुँचैत छथि। राहुल आ प्रियंका दुनू हमर नेता छथि। जँ हम दुनूकेँ एक जगह पर राखि देब तखन आन जगह पर की होएत ? हुनका सबहक मदद करए केर अछि। ओ जे निर्णय लैत छथि हम ओकर स्वागत करैत छी। ओ कहलनि जे कतेको आन पैघ नेता चुनाव नहिं लड़लनि। एकर कारण ई अछि जे बहुतो लोक विधानसभामे प्रवेश कयने छलाह। एकर अतिरिक्त, हुनक रणनीति छल जे अपन बदला ककरो आनकेँ मौका देल जाय।

खरगे कहलनि “हमर इच्छा छल जे वरिष्ठ नेता देश भरिमे पार्टीक लेल प्रचार करथि। हम सभकेँ चुनाव लड़ए लेल नहिं कहि सकैत छी। जे चुनाव लड़ि रहल छथि ओकरा हम मजबूत कए रहल छी। मुदा हमरा लेल ओ सभ सेहो महत्वपूर्ण छथि जे पार्टीक रणनीति तैयार कऽ रहल छथि।” भाजपा आइ देशक सभ संस्थानकेँ कुचल रहल अछि। एहन स्थितिमे ई चुनाव बच्चासँ लऽ कऽ बुजुर्ग तक सबहक लेल जरूरी अछि।

एहि दौरान खड़गे कांग्रेस द्वारा मात्र ३२८ सीट पर चुनाव लड़बा पर सेहो बात कयलनि। ओ कहलनि जे हमसभ रणनीतिक अन्तर्गत ई कयलहुँ अछि किएक तँ सीट सहयोगी दलक सङ्ग बाँटबाक छल। एतबे नहिं, खड़गे कहलनि जे २००४ जकाँ चुनाव जीतलाक बाद प्रधानमंत्री पदक लेल फैसला करब। हम सभ २००४ केर आम चुनावे जँका चौँकायब। तखनो चर्चा छल जे अटल बिहारी वाजपेयीक सरकार घुरि सकैत अछि, मुदा परिणाम चौंकाबय वाला भेल छल। खड़गे कहलनि, “हम अपन सहयोगी दलक लेल समझौता कयलौंह आ अपन इतिहासमे सबसँ कम सीट पर चुनाव लड़बाक निर्णय लेलहुँ।”