पाकिस्तानक दिसिसँ जम्मू-कश्मीरसँ पंजाब धरि आ राजस्थानमे कयल जा रहल ड्रोन हमला केर भारत करारा जवाब देलक। पाकिस्तानक आर्मी स्वयं दावा कयलक जे तीनटा एयरबेसकेँ निशाना बनायल गेल अछि। ओम्हर दिल्लीमे पीएम मोदीक संग तिनू सेना प्रमुख, सीडीएस आ रक्षा मंत्री राजनाथ सिंहक संग महत्वपूर्ण बैठक भेल अछि। विदेश मंत्री जयशंकर द्वारा सीजफायरकेँ जानकारी देल गेल।
विदेश मंत्री डॉ. एस जयशंकर ट्वीट करैत कहलन्हि, “भारत आ पाकिस्तानक बीच आइ गोलीबारी आ सैन्य कार्यवाहीकेँ रोकबा पर सहमत भेल अछि। भारत सभ प्रकार आ अभिव्यक्तित्वमे आतंकवादक खिलाफ लगातार दृढ़ आ अडिग अछि।
जम्मू-कश्मीरक पूर्व डीजीपी शेष पॉल वैद भारत-पाकिस्तान संघर्षविराम समझौता पर कहलनि, “हमरा लगैत अछि कि भारत शर्त रखलक अछि कि पाकिस्तान आतंकवाद बंद करत, आतंकवादक कोनो कार्यवाही युद्धक कार्यवाही होयत। संघर्ष विरामक स्वागत अछि। भारत कखनो कोनो देशक खिलाफ आक्रामक तरीकासँ काज नहि करैत अछि, हमर नीति बहुत स्पष्ट अछि। हम विश्वक चारिम सबसँ पैघ अर्थव्यवस्था बनि गेल छी, हमर दौड़ तेसर, दोसर, पहिल अर्थव्यवस्था बनबाक अछि। हम युद्ध आ आतंकवादमे विश्वास नहि करैत छी।”
भारत अपने शर्त पर सीजफायर लेल सहमति देलक। विदेश मंत्रालय विदेश सचिव विक्रम मिस्री कहलनि, “पाकिस्तानक सैन्य संचालन महानिदेशक आई अपराह्न 15:35 बजे भारतीय डायरेक्टर जनरल ऑफ मिलिट्री ऑपरेशंसकेँ फोन कएलनि। हुनकर बीच सहमति भेल कि दुनू पक्ष भारतीय मानक समय अनुसार 17:00 बजेसँ जमीन, हवा आ समुद्रमे सभ तरहक गोलीबारी आ सैन्य कार्यवाही बंद कय देत। दुनू पक्षकेँ एहि सहमतिकेँ लागू करबाक निर्देश देल गेल अछि। सैन्य संचालन महानिदेशक 12 मईकेँ 12:00 बजे फेरसँ बातचीत करताह।”
पाकिस्तानक उपप्रधानमंत्री एकटा बयानमे कहलनि – हम तात्कालिक प्रभावसँ युद्ध विराम पर सहमत छी। पाकिस्तानक उप प्रधानमंत्री आ विदेश मंत्री इशाक डार द्वारा ट्वीट कएल गेल, “पाकिस्तान आ भारतक मध्य तात्कालिक प्रभावसँ युद्ध विराम पर सहमत भऽ गेल अछि। पाकिस्तान सदिखन अपन संप्रभुता आ क्षेत्रीय अखंडतासँ समझौता कयने बिना क्षेत्रमे शांति आ सुरक्षा लेल प्रयास कएलक अछि।”
