राजद प्रवक्ता मृत्युंजय तिवारी कहलनि जे जखनि बीजेपी लालूसँ राजनीतिक लड़ाई नहि जीति पाबैत अछि, तखने एकरा चुनावसँ पूर्व चारा घोटालाक याद अबैत अछि। बिहार विधानसभा चुनावसँ ठीक पहिने नीतीश सरकार चारा घोटालाक लऽ कऽ एकटा पैघ डेग लेबय जा रहल अछि। चारा घोटालाक पैसाकें बिहार सरकार अपन खजानेमे वापस अनबाक तैयारी कय रहल अछि। जकरा लेल उपमुख्यमंत्री सम्राट चौधरीक प्रतिक्रिया आयल।
ओ कहलनि कि, जे लोग चारा घोटालामे संलग्न छथि, हुनकर सम्पत्तिसभ कुर्क कऽ कोर्टक समक्ष समर्पित कएल जायत। न्यायालय द्वारा सरकारक खजानामे पैसा आबय, सरकार केर एतबे कोशिश रहत। सरकार न्यायालयक प्रकियाके समीक्षा कऽ कदम उठाएत।
चौधरी आगू कहलनि जे चारा घोटाला 950 करोड़ रुपैयाक छल, पटना हाईकोर्टक आदेश छल जे घोटालाक पैसा सरकारक खजानामे फेरसँ लौटबाक चाही। पटना हाईकोर्ट चारा घोटाला केर जांच सीबीआईकेँ सौंपैत ओहि समय गबन कएल गेल रुपैयाक बिहार सरकारक खजानामे फेरसँ लौटाबय केर जिम्मेदारी सेहो देने छल।
उपमुख्यमंत्री कहलनि जे पटना उच्च न्यायालय मार्च 1996 मे सीबीआईकेँ जांच सौंपने छल। एहि घोटालामे शामिल नेता, अधिकारी पर अखनो चलि रहल अछि। न्यायालय केर आदेश छल जे चारा घोटालाक धन सरकारक खजानामे आबए चाही। घोटालामे शामिल लोकक सम्पत्ति जब्त कएल गेल छल तकरा आब कुर्क कएल जायत आ सरकारी खजानामे धन वापस आनल जायत।
तहिना जदयू केर मुख्य प्रवक्ता नीरज कुमार कहलनि जे लालू परिवार राजकोषक लूटेरा अछि। लालू परिवार अवैध रूपसँ संपत्ति अर्जित कएने अछि। चारा घोटालाक काफी संपत्ति बनाओल गेल। ओ कहलनि जे भ्रष्टाचारसँ जे संपत्ति अर्जित कएल गेल अछि ताहिसँ जननायक कर्पूरी ठाकुर छात्रावास आ डॉ. अंबेडकर छात्रावास बनल। ताकि पिछड़ा-दलित जनता बुझि सकए जे राजकोषक लूटेरा लालू परिवारकेँ केवल कारावास नहि, बल्कि भूमि अधिग्रहणक दंड सेहो भेटबाक चाही।
राजद प्रवक्ता मृत्युंजय तिवारी संपत्ति कुर्क करबाक मामिलामे कहला जे जखनि-जखनि बीजेपी लालू’सँ राजनीतिक लड़ाई नहि जीत पाबैत अछि, तखनि-तखनि ओकरा चुनावसँ पहिने चारा घोटाला केर याद अबैत अछि।
