केन्द्र शासित प्रदेश जम्मू-कश्मीरक २४ विधानसभा सीटक लेल बुधकेँ मतदान भेल। पहिल चरणक मतदानमे इलेक्ट्रॉनिक वोटिंग मशीन (ईवीएम)मे जम्मू संभागक आठ सीट आ कश्मीर घाटीमे १६ सीटक लेल उम्मीदवारक भाग्यक फैसला बंद भेल।
प्रधानमंत्री मोदी एक्स पर मतदान पूर्व लिखलनि, “जम्मू-कश्मीर विधानसभा चुनावक पहिल चरण शुरू होबए केर संग, हम ओहि सभ निर्वाचन क्षेत्रसँ आग्रह करैत छी जे ओ बेसी संख्यामे मतदान करथि आ लोकतंत्रक पाबनिकेँ मजबूत करथि। हम विशेष रूपसँ पहिल बेरक मतदाता सभसँ आग्रह करैत छी जे ओ अपन मताधिकारक प्रयोग करथि।”
पूर्व मुख्यमंत्री महबूबा मुफ्तीक बेटी इल्तिजा मुफ्ती बिजबेहरा सीट पर जखनि कि किश्तवाड़सँ भाजपाक शगुन परिहारक प्रतिष्ठा दांव पर लागल अछि।
अगस्त २०१९ मे अनुच्छेद ३७० केर निरस्त होबए केर बादसँ जम्मू आ कश्मीरमे इ पहिल विधानसभा चुनाव भेल।
जनतब जे जाहि निर्वाचन क्षेत्रम आइ मतदान भेल ओहिमे पंपोर, त्राल, पुलवामा, राजपोरा, जैनापोरा, शोपियां, डीएच पोरा, कुलगाम, देवसर, डूरू, कोकरनाग (एसटी), अनंतनाग पश्चिम, अनंतनाग, श्रीगुफवारा-बिजबेहरा, शांगस-अनंतनाग पूर्व, पहलगाम, इंदरवाल, किश्तवाड़, पद्दर-नागसेनी, भद्रवाह, डोडा, डोडा पश्चिम, रामबन आ बनिहाल शामिल अछि। साँझ ५ बजे तक ५८.१९% मतदान भेल, किश्तवाड़मे सबसँ बेसी ७७.२३% मतदान भेल।
जम्मू-कश्मीर विधानसभा चुनावक पहिल चरणक मतदान बुधदिन साँझ ६ बजे समाप्त भऽ गेल। ७ जिलाक २४ विधानसभा सीटक लेल मतदान भेल। साँझ ५ बजे धरि मतदान प्रतिशत ५८.१९% छल।
साँझ ५ बजे धरि देल गेल आंकड़ाक अनुसार, किश्तवाड़मे सबसँ बेसी ७७.२३% आ पुलवामामे सबसँ कम ४३.८७ मतदान भेल। आइ २३.२७ लाख मतदाता मतदान करय वाला छलथि।
बिजबेहरासँ पीडीपीक उम्मीदवार पार्टी प्रमुख महबूबा मुफ्तीक बेटी इल्तिजा मुफ्ती वोट देलनि। किश्तवाड़सँ भाजपा उम्मीदवार शगुन परिहार सेहो वोट देलनि।
शगुन आरोप लगओने छलाह जे किश्तवाड़क बागवान मोहल्लामे बिना पहचान पत्रक वोट पड़ल। एकर बाद माहौल गर्म भऽ गेल, जाहि कारण किछु समय लेल मतदान रोकि देल गेल।
देशक विभिन्न राज्यमे रहनिहार ३५,००० सँ बेसी कश्मीरी पंडित सेहो पहिल चरणक मतदानक लेल वोट देलनि। हुनका लोकनिक लेल कुल २४ टा विशेष बूथ बनाओल गेल छल। दिल्लीमे ४, जम्मूमे १९टा आ उधमपुरमे १टा बूथ छल।
