पूरा मामिलामे कारवाई करैत पुलिस बीडीओ विनीत कुमार सिंहक बयान पर २१ नामित आ १८० अज्ञात लोकक खिलाफ मामिला दर्ज कयलक अछि।
ओतहि पुलिस एहि मामिलामे कारवाई करैत ८ गोटेकेँ गिरफ्तार कऽ जेल पठा देलक अछि। गिरफ्तार शरारती तत्वक पहिचान बोध सहनी, राहुल कुमार, चुल्हाई दास, मिथुन मिश्रा, राम बलम दास, चण्डेश्वर दास, अर्जुन कुमार आ मुकुन्द कुमारक रूपमे भेल अछि। पूरा मामिला पर प्रशिक्षु डीएसपी अभिजीत अलकेशक कहब छनि जे प्रत्येक बदमाशकेँ चिन्हित कऽ गिरफ्तार कऽ लेल जायत।
बीडीओ विनीत कुमार सिंह अपन शिकायतमे लिखलनि जे शुक्रदिन गोपालपुर चौक लग एकटा सामुदायिक भनसाघर चलि रहल छल। एम्हर दीनबन्धु क्रांतिकारी, अमरेन्द्र कुमार, विजय दास आ यूट्यूबर मिथुन कुमार गामक लोकक संग गोपालपुर चौक पहुँचलाह। जकर बाद गामक लोक सभ वार्डमे सामुदायिक भनसाघरक व्यवस्था करबाक माँग करय लागल। एम्हर किछु लोक क्षतिपूर्तिक माँग सेहो करय लागल। जकर बाद बाढ़ि पीड़ित सभ राजमार्ग अवरुद्ध कऽ देलक।
एनएच ७७ पर दुनू दिससँ गाड़ीसभक नमगर कतार लागि गेल। जहिना राजमार्ग अवरुद्ध होयबाक सूचना भेटल, पुलिस बाढ़ि पीड़ितसभकेँ मनाबय लेल घटनास्थल पर पहुँचि गेल। पीड़ित सभ पुलिसक बात नहि सुनलक आ गाड़ीसभमे तोड़फोड़ करब शुरू कऽ देलक। एम्हर किछु समयक बाद आक्रोशित बाढ़ि पीड़ित पुलिस पर पथराव शुरू कऽ देलक, जाहिमे एकटा पुलिस अधिकारी मनोज सिंह गम्भीर रूपसँ घायल भऽ गेलाह। आन पुलिसकर्मी सेहो घायल भेल छथि।
