बिहारक मुख्यमंत्री नीतीश कुमार रविकेँ पटनाक कार्यक्रममे गृह मंत्री अमित शाहक सामने पुनः एक बेर कहलनि जे हुनकासँ पहिने दु बेर गलती भेल अछि। ओ एनडीएसँ दु बेर अलग भेल छलाह, मुदा आब ओ एना नहि करताह। ओ लालू यादव आ राबड़ी देवीक शासनकाल पर सेहो निशाना साधलनि आ अपन सरकारक उपलब्धि गिनौलनि।
दरअसल, पटनाक बापू सभागारमे सहकारिता विभागक एकटा कार्यक्रम छल। नीतीश कुमार एहि कार्यक्रममे कहलनि जे सहकारिता क्षेत्रसँ लोककेँ बहुत लाभ भ’ रहल अछि। अमित शाहक केंद्रीय सहकारिता मंत्री बनबाक बाद बिहारकेँ कतेको योजनाक लाभ भेटल अछि। एहिसँ बिहार आ समस्त देशमे लोककेँ लाभ भेल अछि।
नीतीश कुमार जीविका योजनाकेँ अपन सरकारक एकटा पैघ उपलब्धि बतौलनि। ओ कहलनि जे जखनि केंद्रमे कांग्रेसक सरकार छल, तँ हुनक मंत्री बिहारमे जीविका योजनाकेँ देखबाक लेल आएल छल। एहीक बाद केंद्र सरकार सम्पूर्ण देशमे जीविका योजना चलौलक।
नीतीश कुमार अमित शाहक उपस्थितिमे स्वीकार कयलनि जे हुनकासँ पहिने दू बेर गलती भेल छल। ओ कहलनि जे हम दू बेर एनडीए छोड़लौं, मुदा आब हम एना नहि करब। हम पार्टीक किछु लोकक कहलाक अनुसार एनडीए छोड़ने छलौं। मुदा आब ई गलती नहि करब।
एही दौरान नीतीश कुमार लालू यादव आ राबड़ी देवी पर निशाना साधलनि। ओ कहलनि जे 24 नवंबर 2005 सँ पहिने बिहारमे किछु काज नहि भेल छल। लोक सांझक बाद अपन घरसँ बाहर नहि निकलैत छल। ओ कहलनि जे आई शिक्षा, स्वास्थ्य आ विकास केर क्षेत्रमे बहुत काज भेल अछि। नीतीश कुमार कहलनि जे पहिने बिहारमे हिंदू-मुस्लिमक बीच झगड़ा होइत छल। किन्तु आब एहेन घटना पर पूरा नियंत्रण अछि।
ओ कहलनि जे 2005 मे जे बिहारक कुल बजट छल, आइ तकरासँ 10 गुनासँ बेसी राज्यक बजट भ’ चुकल अछि। महिला आब बिहारमे सेहो अपन प्रतिनिधित्व करैत छथि। ई सभ याद रखबाक चाही।
