केन्द्रीय मन्त्री चिराग पासवान बिहारक मुख्यमंत्री नीतीश कुमारकेँ पत्र लिखि हालक भेल वर्षा आ तेज हवासँ खेतक फसल सभक पहुंचल नुकसान पर चिंता प्रकट करैत उचित मुआवजा आ मददि देबाक अपील कयलनि अछि।
लोजपा (रामविलास) केर अध्यक्ष चिराग पासवान मुख्यमंत्रीकेँ लिखल पत्रमे कहलनि जे हालहिमे बिहारक विभिन्न जिलामे भेल भीषण आ असमयक वर्षा किसान सभपर अत्यन्त दुखदायी प्रभाव डाललक अछि। खेतमे पकबाक लेल तैयार गहूँमक फसल भारी वर्षाक चलते बर्बाद भ’ गेल अछि। किसान आब हताशा आ निराशाक स्थितिमे पहुँचि गेल छथि। खेतमे लहलहाइत फसल आब सड़य लागल अछि, जकर कारण किसान सभक मेहनति, उम्मीद आ जीविका एक संग डूबि गेल अछि।
चिराग आगू लिखलनि, “प्रदेशक लाखों किसानक समक्ष एहि भीषण प्रकृतिक आपदाक कारण जीविकोपार्जनक संकट उपस्थित भ’ गेल अछि। स्थिति केर गंभीरताकेँ देखैत, किसान सभक जीवन आ भविष्यकेँ सुरक्षित रखबाक लेल त्वरित आ ठोस कदम उठेनाइ अत्यन्त आवश्यक अछि।”
ओ पत्रमे आगू लिखलनि अछि जे हुनकर पार्टीक मांग अछि जे असमय बर्षाकेँ राज्य आपदा घोषित कएल जाए, ताकि आपदा राहत कोषसँ प्रभावित किसान सभकेँ तात्कालिक सहायता प्रदान कएल जा सकय। एहि केर अलावा राज्य स्तर पर तात्कालिक सर्वेक्षण अभियान चलाओल जाए, जाहिसँ क्षतिक सही आकलन क’ प्रभावित किसान सभकेँ शीघ्र मुआवजा देल जा सकय।
पत्रक माध्यमसँ ओ प्रभावित किसान सभकेँ कृषि ऋण पर राहत देल जाय, आगामी फसलक लेल विशेष सहायता योजनाकेँ घोषणा करबाक आ प्रभावित जिला सभमे विशेष राहत अभियान चला कऽ किसान सभकेँ खाद्य सामग्री, चिकित्सा सुविधा आ पशु चारा आदि तात्कालिक उपलब्ध कराबय केर सेहो मांग कएलन्हि अछि। केंद्रीय मंत्री अपन पत्रमे लिखलनि अछि, “एहि प्राकृतिक आपदामे बहुत लोकक जानो गेल अछि, जे अत्यंत दुखद आ पीड़ादायक अछि। मृतकक परिजनक प्रति हमर गहन संवेदना अछि। हमर एनडीए सरकार चारि लाख टाकाक मुआवजा राशिक सेहो घोषणा कएलख अछि, मुदा पीड़ित परिवारक जीविकोपार्जनक लेल आश्रित सभकेँ आर सरकारी लाभक आवश्यकता अछि। एहेनमे सरकार द्वारा जे संभव मददि होए, ओ कएल जाए।”
