प्रधानमंत्री नरेंद्र मोदी काल्हि कहलनि 7 मईकेँ भारत पाकिस्तान आ पीओकेमे ऑपरेशन सिंदूरक अंजाम देलक जकरा बाद पाकिस्तान भारतक सीमावर्ती इलाकामे ड्रोनसँ हमला करय केर कोशिश केलक। हालाँकि, पाकिस्तानक सभ ड्रोन भारतीय डिफेंस सिस्टम द्वारा नष्ट कय देल गेल।
बीकानेरसँ मोदी भारतीय सेनाकेँ सलाम करैत कहलनि कि भारतक तीनू सेना चक्रव्यूह रचि कय पाकिस्तानकेँ घुटना टेकय पर मजबूर कय देलक। प्रधानमंत्री मोदी कहलनि, “भारत एटम बमक गीदड़भभकीसँ डरयवला नहिं अछि। आतंकी आ ओकर आकाकेँ आब अलग नै देखल जायत।”
प्रधानमंत्री नरेंद्र मोदी ऑपरेशन सिंदूरक ऐतिहासिक सफलताक बाद काल्हि राजस्थानकेँ विकासक कतेको पैघ सौगात सभ देलनि। बीकानेरक नाल एयरबेस पर उतरलाक बाद प्रधानमंत्री देशनोक स्थित करणी माता मंदिरमे पूजा-अर्चना कयलनि आ शूरवीरक प्रदर्शनीक अवलोकन कयलनि। ताहि परिप्रेक्ष्यमे ओ अमृत भारत स्टेशन योजनाक तहत विकसित देशनोक स्टेशन सहित देशभरिक 103 स्टेशनक वर्चुअल उद्घाटन कयलनि। एहिमे राजस्थानक 8 स्टेशन शामिल अछि।
जनतब जे देशनोकसँ सड़क मार्गसँ होइत पीएम मोदी पलानाक जनसभा स्थल पहुँचला, जतय मुख्यमंत्री भजनलाल शर्मा हुनका पगड़ी पहिराकेँ आ चरखा भेंट कए स्वागत कएलनि। देशनोक रेलवे स्टेशन पर प्रधानमंत्री बीकानेर-बांद्रा टर्मिनस साप्ताहिक एक्सप्रेसकेँ हरियर झंडी देखाकए रवाना कएलनि। फूलसँ सजल एहि 9 ट्रेन सेवाक शुभारंभक दौरान पीएम मोदी तिरंगा लऽ ठाढ़ बच्चासँ भेंट कएलनि, हुनका संग बात कएलनि आ ऑटोग्राफो देलनि।
प्रधानमन्त्री देशभरिमे अमृत भारत योजनाक अंतर्गत विकसित 103 रेलवे स्टेशनक लोकार्पण कएलनि। राजस्थानक फतेहपुर शेखावाटी, देशनोक, बूंदी, मांडलगढ़, गोगामेड़ी, राजगढ़, गोविंदगढ़ आ मंडावर-महुआ रोड स्टेशन सेहो एहीमे शामिल अछि। ई स्टेशन आधुनिक सुविधासभ, हरित प्रौद्योगिकी आ यात्री-सुलभ संरचनाक प्रतीक बनत।
प्रधानमंत्री मोदी राजस्थानक विकासक लेल गति देबयवला कतेको परियोजना सभकेँ राष्ट्रकेँ समर्पित कयलनि आ नव योजना सभक नींव रखलनि।
जनतब जे, काल्हि बीकानेरमे 7 सड़क परियोजना (4850 करोड़ रूपया लागत सँ) राष्ट्रकेँ समर्पित कयल गेल। बीकानेर, नावा, डीडवाना, कुचामनमे सौर ऊर्जा आ ट्रांसमिशन परियोजनाक शिलान्यास कयल गेल। ओतहि, राजसमंद, प्रतापगढ़, धौलपुर आ भीलवाड़ामे नर्सिंग कॉलेजक उद्घाटन कयल गेल, संगहि पाली आ झुंझुनूमे जल परियोजनाक सौगात देल गेल।
